ئارامكۆ ڤه‌گه‌ری هێزا پێش ئێریشێ

ئه‌ره‌بستانا سئوودیێ ئیرۆ ئه‌شكه‌ره‌ كر، ئاستا به‌رهه‌ما وان ئا په‌ترۆلێ، وێ هه‌فتیه‌كه‌ دن ڤه‌گه‌ر وێ ئاستا پێش ئێریشا سه‌ر ئارامكۆیێ.

ل گۆر چاڤكانیێن وه‌زاره‌تا په‌ترۆلا سئوودیێ، دگه‌ل خه‌باتا تیمێن ته‌كنینك ئێن شركه‌تا ئارامكۆ، هه‌یا نها قاسی 75% ئا وێ به‌رهه‌ما ژ سه‌ده‌ما ئێریشا سه‌ر فابریقه‌یێن شركه‌تێ ژ ده‌ستچووی، جار دن هات ب ده‌ستخستن، ئه‌ڤ ئامانج ژی، وێ هه‌فتییه‌كا دن وه‌ره‌ بده‌ستخستن.

هه‌ر وها ئه‌شكه‌ره‌ بوو كو سئوودی وی هه‌فتیه‌كا دن به‌رهه‌ما خوه‌ ئا په‌ترۆلێ و ئاستا هه‌نارده‌یێن خوه‌ نۆرمال بكه‌ و وه‌كه‌ پێش ئیریشا سه‌ر ئارامكۆ وه‌ره‌ كرن، ئه‌و ئێریشا كو ژ سه‌ده‌ما وێ، 50% ئا به‌رهه‌م و هه‌نارده‌یا سئوودیێ هاتی‌ سه‌كناندن.

وان چاڤكانیان خوه‌یا كرنه‌، به‌رهه‌ما نها ئا كێلگه‌ها خه‌ریس ب قاسی 1.3 ملیۆن به‌رمیلانه‌ د رۆژێ ده‌، هه‌موه‌خت به‌رهه‌ما كێلگه‌ها به‌قیق دبه‌ 3 ملیۆن به‌رمیل.

ل 14 ئیلۆنا ئیسال، 2 باله‌فرێن جه‌نگی ئێن بێ پیلۆت، ئێریشی شركه‌تا په‌ترۆلا نه‌ته‌وه‌ئی ئا په‌ترۆلا سئوودیێ ئارامكو كرن، ب سه‌ده‌ما ئێریشێ شه‌وات ده‌ركه‌ت و 2 فابریقه‌یێن ئارامكۆ ژ كار و به‌رهه‌مئانینێ قوت بوون.

زرارا ئێریشێ ل سه‌ر سئوودیێ، هه‌موه‌خت بازارێن جیهانێ ئێن په‌ترۆلێ پر مه‌زن بوون، ژبه‌ركو ئێریشێ 5.7 ملیۆن به‌رمیلێن رۆژانه‌ ژ ئاستا هه‌نارده‌ و به‌رهه‌ما سئوودیێ كێم كرن.

ل بازارێ جیهانێ، ئێریشێ نرخا په‌ترۆلێ پر بلند كر و گهیشت 19%، لێ به‌لێ ویلایه‌تێن یه‌كبووی ئێن ئه‌مه‌ریكایێ هه‌ر د زوو ده‌ ده‌ركه‌ت هۆلێ و رێنه‌دا په‌ترۆل زێده‌تر بلند ببه‌ و دۆنالد ترامپ ئێ سه‌رۆكێ ئه‌مه‌ریكایێ دا خوه‌یاكرن كو وان په‌ترۆله‌كه‌ هه‌ری زێده‌ د ئومبارێن ئه‌مه‌ریكایێ ده‌ هه‌یه‌ و ئه‌وێ باڤێژنه‌ د بازاران ده‌، ژ بۆ كو نرخ جار دن ل ئاستا خوه‌ ئا ئاسایی جی بگرن.