سامسونگ دێ به‌رهه‌مئینانا مۆبایلا خوه‌ ل چینێ راگریت

سامسۆنگ دێ به‌رهه‌مئینانا مۆبایلا خوه‌ ل چینێ راگریت

كۆمپانیا سامسونگ یا كۆریایی ئیرۆ بریارا خوه‌ راگهاند كو ئه‌و دێ به‌رهه‌مئینانا ئامیرێن ژیر و مۆبایلێن خوه‌ ل ولاتێ چینێ راگریت.

هنه‌ك چاڤكانیان ژ سامسونگێ ڤه‌گوهاستنه‌ كو كۆمپانیا ئه‌لیكترۆنی یا كۆریا یا باشوور سامسۆنگ، ئێدی مۆبایلێن خوه‌ ل ولاتێ چینێ به‌رهه‌م نا ئینیت، ب سه‌ده‌ما هه‌ڤركیا بازاری كو زۆر به‌رهه‌مین چینی ب نرخه‌كا هه‌ری كێم ل بازارا وی ولاتی تێن ب ده‌ستخستن.

سامسونگێ ئه‌شكه‌ر كر كو ئه‌و دێ كارسازیا خوه‌ یا چێكرنا مۆبایلان ل باژارێ هێچۆ یێ چینی دائێخیت.

بسپۆرێن بازاران نه‌رینا خوه‌ ل سه‌ر وێ بریارا سامسونگێ ئانینه‌ زمان، ئه‌و دبێژن: گه‌لێ چینێ هه‌رده‌م حه‌زا وان ل سه‌ر مۆبایلێن ژ به‌رهه‌ما خۆمالی و یێن نرخا وان كێم هه‌یه‌، وه‌ختا كو دخوازن ژی مۆبایله‌كا گران بها ژی بكرن، ئه‌و به‌رێ خوه‌ د دن ئه‌پل و هواویێ، له‌و هه‌نگاڤه‌كا ته‌ندروسته‌ سامسۆنگێ هاڤێتی.

ل گۆر داتایان د 3 هه‌یڤێن ده‌ستپێكا 2019 دا، ئاستا فرۆتنا به‌رهه‌مێن سامسونگێ ل چینێ ته‌نێ 1% بوون، ل چاڤ 3 مه‌هێن ده‌ستپیكا 2018 گه‌له‌ك داكه‌تیه‌ كو ل وێ ده‌مێ 15% بوو.