ژبه‌ر داگیركرنا رۆژئاڤا كوردستانێ ئەورۆپایێ ئالیکاریێن دارایی بۆ ترکیێ قوتكرن

ژبه‌ر داگیركرنا رۆژئاڤا كوردستانێ ئەورۆپایێ ئالیکاریێن دارایی بۆ ترکیێ قوتكرن

تۆرا مەدیایی یا “فۆنکە” ژ زارێ بەرپرسێ سیاسەتا دەرڤە یا یەکیتیا ئەورۆپا راگهاند ب رێژەیا 75٪ ئالیکاریێن دارایی وێ ژ بۆ ترکیێ وەرن کێم کرن و گرنگترین سەدەم ژی ژ بۆ ئێریشا داگیرکاریا ئەنقەرێ ل سەر رۆژئاڤایێ کوردستانێ دا زانین.

ئاژانسا فەرەنسا ب پشت بەستن ب راپۆرەکە تۆرا مەدیایی یا فۆنکە، بەلاڤکر کو ژۆزێف بۆرل، بەرپرسێ سیاسەتا دەرڤە یا یەکێتیا ئەورۆپا، د نامەیەکێ دە ژ بۆ پارلەمەنتۆیا ئەورۆپایێ نڤیساندیە کو ئالیکاریێن دارایی یێن ڤێ یەکێتیێ ژ بۆ ترکیێ د سالا 2020ان دە وێ ب رێژەیا 75٪ وەرن کێم کرن.

ل گۆر وێ راپۆرێ، ژۆزێف بۆرل، پەرلەمانتۆیا ئەورۆپایێ ئاگەهدار کریە کو کێمکرنا ئالیکاریێن دارایی ژ بۆ ترکیێ ب ئەگەرا ئێریشێن سوپایێ ترکیێ بۆ سەر رۆژئاڤایێ کوردستانێ و هەر وها پێکۆلێن نەیاسایی یێن ڤی ولاتی ژ بۆ دەرهینانا غازا سرۆشتی ل زەریایا سپی و ل نێزی قوبرسێ کو یەکە ژ ئەندامێن یەکیتیا ئەورۆپایێ ڤەدگەرن.

ئالیکاریێن دارایی یێن یەکێتیا ئەورۆپایێ ژ بۆ وان ولاتانە کو دخوازن ببن ئەندام د یەکیتیا ئەورۆپایێ دە ب مەرەما پێشدا برنا دەمۆکراسیێ و گەشەیا ئابووری یا وان ولاتان.

گۆتوبێژێن ئەنقەرێ و یەکێتیا ئەورۆپایێ ب مەرەما ئەندامەتیا ترکیێ ل یەکیتیا ئەورۆپایێ دە، دەما چەندین سالانە ب تەمامی هاتینە راگرتن.

دوورکرتنا دەولەتا ترکیێ ژ سه‌روەریا یاسایێ و پێشێلکرنا بهایێن دەمۆکراسیێ ژ ئالیێ وی ولاتی ڤە، ب سەدەمێن سەرەکە یێن راوەستاندنا ڤان گۆتوبێژان تێ زانین.

سوپایێ داگیرکار یێ ترکیێ ل دەستپێکا ئۆکتۆبەرا سالا 2019ان، د ئێریشەکە داگیرکاری دە چەندین ناڤچەیێن رۆژئاڤایێ کوردستانێ داگیرکرن و ل زۆر بواران دە تاوانێن جەنگی ل دژی کوردان ئەنجام دان، ئارمانجا ترکیا یا داگیرکار ژناڤبرنا خەلکێ وان ناڤچەیێن کوردستانێ و جێگیرکرنا نێزی 2 ملیۆن عەرەبێن رادیکالە کو سەر ب گرۆپێن تەرۆریستی یێن نێزی ترکیێ نە.

رۆژئاڤایا کوردستانێ ژ ئالیێ یەکینەیێن پاراستنا گەل، یەپەگێ کو سەر ب پەکەکێ نە دهاتن برێڤەبرن و ترکیێ ئەڤ یەک کر هێنجەت ژ بۆ داگیرکاریا سەر رۆژئاڤایێ کوردستانێ.

شەرڤانێن کورد رۆلەکە مەزن د پاکژکرنا وان ناڤچەیان ژ تەرۆریستێن داعشێ ده‌ هەبوو، زۆر جاران د ئاژانسێن نووچەیان دە باس ل ڤێ یەکێ دهات کرن کو رێخستنا تەرۆریستی یا داعشێ ژ ئالیێ ترکیێ ڤە تێ پشتەڤانی کرن.