داكه‌تنا په‌ترۆلێ دێ كاره‌ساته‌كا جیهانی مه‌زن دروست كه‌ت

داكه‌تنا په‌ترۆلێ كاره‌ساته‌كا جیهانی مه‌زنه‌

خه‌ته‌ر ل سه‌ر ئابووریێن ته‌ك ژێده‌ر هه‌یه‌

نرخا په‌ترۆلێ ئیرۆ رۆژا پێنجشه‌می داكه‌ت 26 دۆلاران پاش كو ب سه‌ده‌ما ڤایرۆسا كۆرۆنایێ 2 دۆلارێن دی ژ دوهـی وه‌ره‌ ژ ده‌ستداین.

ل گۆر بازارێن جیهانێ ئیرۆ رۆژا پێنجشه‌مێ یه‌ك به‌رمیلا په‌ترۆلا برێنت ب 26.53 دۆلاران مامه‌له‌ پێ هاته‌ كرن و خاڤا رۆژئاڤا تێكساس ب 23.53 دۆلاران.

داكه‌تنا بهایێ په‌ترۆلێ ب سه‌ده‌ما ڤایرۆسا كۆرۆنا یا نوو (كۆڤید-19) یه‌ كو ل ده‌ستپێكێ ل وه‌لاتێ چینێ سه‌رهلدا و پاش هه‌ر زوو ل پرانییا وه‌لاتێن جیهانێ به‌لاڤه‌بوو‌، مه‌ترسییا ڤایرۆسێ كۆرۆنا كارتێكرنه‌كا هه‌ره‌ مه‌زن ل ئابوورییا جیهانێ كرییه‌ و ژ به‌ر ڤێ سه‌ده‌مێ بازارێ په‌ترۆلێ زیانه‌كا مه‌زنتر دیتییه‌.

شاره‌زایێن ئابووری وه‌ها دبینن كو ب سه‌ده‌ما بله‌ز به‌لاڤبوونا ڤایرۆسا كۆرۆنایێ، دلگرانییه‌كا زێده‌ ژ وێ كارتێكرنێ چێبوویه‌ كو ل سه‌ر ئابوورییا جیهانێ هاتییه ‌كرن، هه‌روه‌ها ڤه‌كێشانا كۆمپانیێن مه‌زن ژ بۆرسێن جیهانێ ئه‌ڤ مه‌ترسی زێده‌تر كر.

ژ بۆ ڤێ قۆناغێ پێشبینیێن ئابووریناسان ژ بۆ وێ ئاراسته‌یێ دچن كو نرخا په‌ترۆلا برێنت د نێڤبه‌را 25 بۆ 27 دۆلاران دا بمینیت و ئه‌ڤ چه‌نده‌ دێ وه‌ك كاره‌ساته‌كا گه‌له‌ك مه‌زن بیت ژ بۆ وان وه‌لاتێن پشتبه‌ستنێ ل سه‌ر په‌ترۆلێ دكه‌ن.

ڤایرۆسا كۆرۆنا كو نها ته‌ڤ جیهان ل ده‌رمان و ڤاكسینا وێ دگه‌ریت، ئابووریناسێن جیهانی دبینن، پاش ڤێ ره‌وشێ هه‌ڤسه‌نگییا هێزێ دێ ل سه‌ر ئاستا جیهانێ هێته‌ گوهارتن، ئه‌مه‌ریكا نامینیت ئابوورا یه‌كه‌م ل جیهانێ، لێ به‌لێ دێ ل گه‌ل چینێ سه‌ركێشیێ كه‌ت، هه‌روه‌ها دبینن ئابووریێن ته‌ك ژێده‌ر دێ خه‌ته‌ر و گه‌فا نه‌مانێ ل سه‌ر بیت.