تەڤلیهەڤیێن ھزرا ئاپۆی د مژارا «ژن، سێكس و ئازادیێ» ده‌

ژ پرتووکا «ژنۆفۆبیا ئۆجەلان «یا نڤیسكار ئاسۆ کەمال

  • به‌شا یه‌كێ

ژنۆلۆژی پرتووکا ئۆجەلان د سالا 2012ان دە ژ ئالیێ ئاکادیمییا ژنێن پەکەکێ ڤه‌ ھاتییە چاپ کرن، د ڤێ پرتووکێ دە، نەرینێن خوە ل دۆر زانستێ ژنێ، مودێلا بلند یا ژنێ، سێکس، ئەشق و تایبەتمەندییا ژنا کورد و پرسگرێکێن ژنا پەکەکه‌ باس کرنە.

ئۆجەلان د ڤێ پرتووكێ دا وها نیشا ددە کو پرسا ژنێ زانستی کرییە و ئەو دبێژە: «کاراکتەرێ نێرسالارییا جڤاکی تا سەردەما نها دەرفەت نەدایە ھەلسەنگاندنەکە زانستی ژ بۆ دیاردەیا ژنێ بێ کرن».

پێشدە دا كو بزانین ئاپۆ یێ فەیلەسۆفێ ئاخر زەمان، چەند شاشێتی و کارەساتێن زانستی د ڤێ پرتووكێ دە ئەنجام دانە، ئەمێ ھنەک پرسان رێز بکین ژ بۆ کو بزانین گەلۆ یا ئاپۆی نڤیساندی زانستە یان ژی کارەساتەکە ئەدەبی و زانستی یە!

ئۆجالان بەهسا دیارده‌یا ژنێ دکە، گەلۆ مەرەم ژ دیارده‌یا ژنێ چی یە؟

ئەرێ بەهسا ستەما ژنێ و چاوانییا پەیدابوونێ دکە؟ یان ژی بەهسا رۆلێ ژنێ یە د جڤاک و ئابوورێ دە؟

ژ بەر کو د ڤان 200 رۆپه‌لێن كو ب دەستێ ئۆجالان هاتنه‌ نڤیساندن، چ میتۆد و ھەلسەنگاندنەکە زانستی بکار نەئانیه‌ داکو بزانین ئەو چ زانسته‌كه‌ نوو یە ئه‌شكه‌ره‌ كری، ئەو کەسێ ژێرە دبێژن ژن ناس!

پرسگرێکا سەرەکە د ڤێ بابەتێ دە ھەر ل دەستپێکێ ئەوە، نزانن ئۆجالان چ رێباز و میتۆدێن زانستی ب کارئانینە همبەر دیارده‌یا ژنێ؟

ئەرێ ئۆجالان وەکە شوونوارناسەكه‌ میتۆدێ خواندنا نڤیسێن کەڤن ئێن سۆمەری، بابلی و ئاشووری ل تاقیگه‌هان ساخ کرنە و هەیا تێزێن زانستا خوە ئا نوو بسەلمینە ل دۆر جودا کرنا ژنێ ژ زەلامی و یاساغ کرنا سێکسی د ژیانا ژنێ دە؟

یان ژی ل سەر بنەمایێ زانستێ مەیدانی لەکۆلین د خێل و عەشیران دە کرنە داکو بزانین گەشەیا خێزانێ و درستبوونا خێزانێ ژ کودەرێ دەستپێکرییە؟

لێ ل گۆر لەکۆلین و دووڤچوونا مە ژ بۆ ڤێ مژارێ، د ڤێ پرتووكێ دە، چ رێباز و میتۆد و ھەلسەنگاندنەکە زانستی ل دۆر دیرۆکا مرۆڤ، خێزان و مولکاتیێ ئاماژە پێ نەکرییە، ژ وان رێباز و میتۆد و ھەلسەنگاندنێن کو ل سەدەیا 20ان ل سەر دەستێ ھزرمەند و فیلۆسۆفێن وەکە «مۆرگان، باخۆفن و کۆڤالیڤیسکی و مارکس و ئەنگلس» دەستپێکری و بەر ب زانینگەھـ و پەیمانگەھان چووی، ھەیا کو بزانین زانستا ئۆجالان چ میتۆد و رێبازەکە زانستی ب بنگەهـ وەرگرتییە.

یا ژ ڤێ کارەسات بارتر ئەڤە کو ئۆجالان وها خوە نیشان ددە کو یەکەم ئینسانە ل سەر دیارده‌یا ژنێ نڤیساندبە!

ھەروەکە ئەو بخوە دبێژە: «ئەز نە باوەرم یەکە دن وەکە من هەبە پەیوەندییا سەربازی، سیاسی و جڤاکی د تەوەرێ ژنێ دا شیرۆڤە کربە» !!

گەلۆ گەر ئەم وها بفکرین کو ئەڤ گۆتنه‌ راستە، لێ بەلێ پێدڤی دکە ئۆجالان ژ مەرە روھن بکە ئەو زانستێ ئەشکەرە کری چ رێباز و له‌کۆلین و میتۆدەکە زانستی ب بنگەهـ وەردگرە! ھەیا کو  لەکۆلینێن وان فیلۆسۆفێن مە ئاماژە پێ كری رەد بکە کو ژ ئەنجامێ دەھان سالێن لێگەرین و له‌کۆلینێن مەیدانی یە !

نزانم ب تو ئاوایی مرۆڤی ئەو وێرەکی یا مەعریفی ھەبە بێژیتە تێز و بووچوونێن خوه‌ زانست، د دەمەکێ ده‌ ئەو بووچوون ب تاقیگه‌هـ و لەکۆلینێن مەیدانی و رێبازێن زانستی نەھاتبە سەلماندن! ئه‌ڤ یه‌ك دبه‌ بووچوونا کەسۆکی، لێ به‌لێ تو جاران نابه‌ زانست!

لێ بەلێ دەما لەکۆلین ب تەنێ د بارەگه‌هێن پەکەکێ دە بە، ئەو بووچوون ژی وێ ب تەنێ ل جەم پەکەکێ ببن زانست!

ل ڤر ئەمێ چەند میناکان ل سەر وان داھێنانێن زانستی یێن ئۆجالان ل دۆر دیارده‌یا ژنێ ئانین زمان رێز بکین، داکو فێهم بکین ئەرێ گەلۆ نرخەکە زانستی د ڤان تشتێن کو ب زانست ددن دیار کرن ھەیە؟ یان ژی خورافاتن  !

ئۆجالان دبێژە: «کرۆمۆسۆمێن ژنێ ژ یێن زەلامی زێدەترن»

  • ده‌ربارا زانستێ مرۆڤ ناسیێ و بایۆلۆژیایێ، ئۆجالان دبێژە: «کرۆمۆسۆمێن ژنێ ژ یێن زەلامی زێدەترن».

لێ زانست دبێژە: کرۆمۆسۆمێن زەلامی و ژنێ یەکسانن و ھەر یەک ژ وان 46 کرۆمۆسۆم هەنە، زەلامی و ژنێ 23 جۆت کرۆمۆسۆم هەنە کو 22 جۆت وەک یەکن و دبێژنێ ئاوتۆسۆم و یا 23ان جودایە و ژێره‌ دبێژن سێکس کرۆمۆسۆم، ژنێ 2 ئێکس X کرۆمۆسۆم هەنە و زەلامی کرۆمۆسۆمەکێ ئێکس X و کرۆموسۆمەکێ وای Y هەیە .

  • تەڤلیهەڤی و ھەڤدژی یا ئۆجالان د ڤان نەرینان دە ئەوە ل جیەکێ سێکس و دروست کرنا خێزانێ ژ ژنێ قەدەخە و حەرام دکە و ل جیەکێ دن ژی دبێژە کرۆمۆسۆمێن ژنێ ژ یێن زەلامی پێترن !

گەلۆ ئەڤ چیە چما ل ڤر فیلۆسۆفێ ئاخر زەمان بخوە ل دژی خوە د ئاخڤە !

  • د زانستێ ئابووری دە ژی ئۆجالان ڤان تێزا ب داھێنان ناڤ دکە دەما دبێژە: «پیشەیا ئابووری و چالاکییا جڤاکی ژنە، د مودێرنیتا سەرمایەداری ده‌، ژن د ئابوورێ دە پەراوێز کرییە».

  • ئابووری پیشەیا ژنێ یە، ئەرێ گەلۆ ئەڤ یەک ب چ واتە تێ؟

ئا راست ل گۆر ئابوورناسان: ئابووری چالاکییەکە مرۆڤی یە ئەڤجا چ ژن ب جی بكه‌ یان زەلام، و  سیستەما بەرھەمئینان و پێگھۆر و پارڤەکرنێ دیار دکە مرۆڤان چ جی د ئابووریێ ده‌ ھەیە، نەرەگەزێ مرۆڤان دیار دکە کا پیشەیا ئابووری چالاکییەکە تایبەت ب ژنێ یە یان زەلامی !

  • ل گۆر ئۆجالان «رۆل دیتنا ژنێ کو بوویە سەنتەر د ئابووریێ دە ئەڤە، ژ بەر کو ژنێ زارۆک ئانینە و زارۆك خوەدی کرینە».

ئەم دپرسین: ئایا سەنتەربوونا ئابوورێ پێکهاتییە ژ زارۆک بوون و زارۆك خوەدی کرنێ؟ ئەرێ ئەڤن یاسایێن بەرھەمئانین و گوهەرین و پارڤەکرنا ئابوورێ؟

ئەرێ ئادەم سمێس و ریکارد و مارکس د کیژان ھێلا ڤێ زانستێ نوو ده‌ نە؟ مخابن وان زانایێن ئابوورێ تەئۆریێن خوە وها سادە و کورت نەکرنە کو ب تنێ ئابوورێ د زارۆک بوون و زارۆك خوه‌دی كرنێ ده‌ شێرۆڤە بکن !

تەڤ بەره‌ڤاژی ژ بۆ کو ژن بکارە د وارێ جڤاکی و ئابووری و سیاسی دە خوە ب سەلمینە مانە پێویست دکە خوە ژ رۆلێ خوە ئێ خوەزایی دوور بکە !

– دیسان ژنۆلۆژییا ئۆجالان دەما بەهسا «مودێرنیتە ئا کاپیتالیزمێ واته‌ سه‌رمایه‌داریێ دکە و دبێژە رۆلا ژنێ د ئابوورێ دە پەراوێزکرییە» ئەو ژی شاش دەرچوو.

– ئا راست ئەڤە کو پاش جڤاکا کۆمۆنیست یا دەستپێکی ژن د بەرھەمئانینا جڤاکی دە لاوازکری و ئاڤێتیە دەرڤە، سەرمایەداریێ جارەکە دن ژن ڤەگەراندییە د ناڤا بیاڤێ بەرھەمئانینێ ده‌.

كریستینا لاگارد سەرۆکا سندوقا دراڤی ئا ناڤنه‌ته‌وه‌ئی

ژبلی پشکدارییا ھزاران ژنان د وارێ کارگەھـ و بەرھەمئانین و خزمەتگوزاری و بازرگانی و دارێشتن و رێڤەبرنا سیاسەتا ئابووری دە.

پوستێن ھەمان بەش