تەڤلیهەڤیێن ھزرا ئاپۆی د مژارا «ژن، سێكس و ئازادیێ» دا‌

تەڤلیهەڤیێن ھزرا ئاپۆی د مژارا «ژن، سێكس و ئازادیێ» دا‌

ژ پرتووکا «ژنۆفۆبیا ئۆجالان» یا نڤیسكار ئاسۆ کەمال

  • به‌شێ سێیێ

ژن فریشتەیە و زەلام درندە ئۆجالان د پەرتوکا ژنۆفۆبیا دا، جیھانێ ل سەر دوو پشکان دابه‌ش دکەت، پشکا خێرێ و یا شەری، بێ گومان د ڤێ دابه‌شكاریێ دا خێرێ ددەته‌ پال ژنێ و شەری ژی ددەته‌ پال زەلامی ب چ ئاوایی؟ فەرموون داکو ئەم بچینە د ناڤا تێزێن ئۆجالان دا:

ئۆجالان د بێژیت: چاندا ژن – دایک ئەڤ چاندە «کولتوورە» ل به‌راهیێ ژ شێوازێ کۆم کرنا بەرھەمی دەربازی بەرھەمئینان یان چاندنا گەنمی بوویە، ئەڤ چالاکی  ژی چالاکیێن ئاشتیێ نە و پێدڤی ب شەری نینە، گەر چ چالاکیێن زەلامی نێچیرڤانی یە ئەڤ ژی پشتا خۆ ل سەر شەری و توندیێ گەرم دکەت، ب ڤێ یەکێ د ئەنجام دا زەلامسالاری دروست دبیت، ھەلبەت زانست ته‌مام بەروڤاژی ڤێ د بێژیت، ل گۆر لێکۆلینێن زانستی: ئەڤ ھەردوو رەگەزە ژن و زەلام، ھەر ژ دەستپێکا دروستبوونا جڤاکێ مرۆڤاتیێ پێکڤە و یەکسان ژیاینە، ڤێ یەکسانیێ رۆلەکێ مەزن و کاریگەر د گوھۆرینێن گرنگ یێن رێکخستنا جڤاکی دا هه‌بوویه‌، ژ وان پەیوەندییا جوتبوونێ و مەزن بوونا مە، باشە گەر زەلام درندە با و ژن ژی فریشتە، گەلۆ ما ل وی چاخی دبوو ئەڤ پرۆسەیە روو بده‌ن!؟

ھەر دڤێ دانوستاندنێ دا، «ھوبێرت بانکرفیت» دبێژیت: ژن و زەلام یەکسان بوون ژ بەر کو ئابوورێ مالێ ل سەر بنەمایەکێ کۆمۆنێستی ب رێڤە دچوو، چاوا؟ ئانکو ژن و زەلامان پێکڤە دروست کر و ب کار دئینا مولکێ ھەموویان بوو وەکی «خانی و بیستان و ئالاڤ» بۆ نموونه‌ «ھایدییا» مالێن وه‌ها ھەبوون، کو ژ نێزیکی 700 کەسان پێک دھاتن و ئێک سەربان ل سەر ھەمیا بوو، ل دەف «نۆتکاکانیادا» کۆمەکا ھۆزان د مالەکێ دا د ژیان.

ئۆجالان ئه‌ڤ تێزه‌ تنێ ژ بۆ راكێشانا سه‌رنجا ژنێ چێكرییه‌

تێزێ زەلامێ درندە و ژنا فریشتە نە بتنێ چ بنەمایێن زانستی نینە، بەلکو تێزەکێ ھند نەیێ مرۆڤاتی یە، زانست شەرم دکەت وه‌ك تێز قەبوول بکەت، لێ ئۆجالان ئەڤه‌ بتەنێ وەک پرۆپاگندە ب کارئینایە داکو سەرنجا ژنێ پێ راکێشیت! باشە گەر بنەکۆکا توندوتیژیێ ل گۆری ئۆجالان ژ کارێ نێچیرڤانییا زەلامی سەرھلدابیت، گەلۆ ئۆجالان دشێت بەرسڤا ڤێ پرسێ بده‌ت، ئەرێ پا بۆچی دەمێ کارێ زەلامی بوویە شڤانی و جۆتیاری و کرێکاری، توندوتیژی ب دوماهی نەھات؟ د دەمەکی دا چ ژ ڤان پیشەیان وه‌ك نێچیرڤانیێ توندوتیژی تێدا نەھاتییە ب کار ئینان؟

ئۆجالان بەردەوام دبیت ل سەر شه‌رمه‌زار كرنا زەلامی تا وێ ئاستێ کو تیۆریه‌ك ژ بنێ پێخۆ چێکرییە و هاڤێتییە سەر حسابا فسیۆلۆژی لەوا دبێژیت: زەلام ژ ئالیێ فسیۆلۆژی ڤه‌ فێل و درەو و تالان کرینه‌! دیسان د بێژیت: زەلام ئێکەم رێکخستنا توندوتیژیێ یە، کو ب تنێ گیانەوەر نە ئێخستینە تەلھا خۆ، بەلکو ژن و زارۆك ژی ئێخستینە تەلها خۆ! ئەڤ شه‌رمه‌زار كرنا زەلامی یا بەردەوام ژ ئالیێ دەرونناسی وێ چەندێ دده‌ته‌ دیارکرن، کو ئۆجالان ھەلگرێ نەخۆشیێن دەرونی یە، مرۆڤەك ل سەر شه‌رمه‌زار كرنا رەگەزێ خۆ بژیت ژ بۆ بلندکرنا رەگەزێ دی ژبلی كێماسییه‌كا کەسوکی، تشتەکێ دی نینە!

ل گۆر لۆژیکێ ئۆجالانی زەلام هه‌ر ژ دەمێ ژ دایکبوونێ فێلبازن

دا ھێشتا پرسیارا ل دۆر تێزێن ئۆجالانی رێز بکەین، گەلۆ گەر ل گۆر لوژیکێ ئۆجالانی ژن خودان و بەرھەمدارا بەرھەمێن چاندنێ و ئابووری یە، چاوا لۆژیك قەبوول دکەت، ژن خودانا خۆ و ڤان بەرھەمان بیت و دێ ئێخسیری زەلامی بیت و بن دەستیێ قەبوول کەت؟ باشە بەرێز ئۆجالان دەمێ تو د بێژی ژن خودانا ڤان ھەموو داھێنان و چالاکیێن ئابووری یە بەس یا بوویە کوێلا زەلامی، ما ل وی دەمی تو ژنێ کێم ناکەی کو نه‌شێت سەرکرداتیێ بکەت؟ ژ بەر کو تو د بێژی خۆ چ بیت زەلام یێ فێلبازە و دێ ژنێ ئێخیتە بن سیبەرا خۆ! بۆ ڤێ یەکێ ئۆجالان چ تەفسیرێن زانستی نینن، ژبلی کو ببێژیت زەلام د ئەزەل دا بوونه‌وه‌ره‌كێ توندرەو و فێلباز و دل رەق و تالانکارە ، ئەرێ گەلۆ ئەڤه‌ شروڤەیێن زانستی نە یان ژی خورافات و چیڤانۆکن د دەمەکێ دا کو زانست ژ مێژیه‌ ئەڤ خورافاتە بەتالکرینه‌، ل گۆری زانستێ: ساخلەتێن فێلبازی و تالانکرن و دل رەقی سیفەتێن ئەزەلی یێن چ مرۆڤان نینن، چ مرۆڤ ژ دایک نابن و فێلباز، لێ ل گۆری لۆژیکێ ئۆجالان زەلام دەما ژ دایک دبە فێلبازە، ئەڤ تێزێن ئۆجالان ژ بلی نوکتە و ترانا تشتەک دی نینە!

پوستێن ھەمان بەش