تەڤلیھەڤیێن ھزرا ئاپۆی د مژارا «ژن، سێکس و ئازادیێ» دا

Apo-jin-5

ژ پرتووکا «ژنۆفۆبیا ئۆجالان» یا نڤیسكار ئاسۆ کەمال

  • به‌شێ پێنجێ

ژیانا سێکسی و عەشق

د ڤێ پشکێ دا دێ بەحسا تێزێن ئۆجالان کەین ل دۆر «سێکس و عەشقێ» ل گۆری من پرتووکا ژنۆلۆژی یا ئۆجالان به‌ھانەیەکە بۆ قەدەغەکرنا سێکسی د ناڤ رێزێن پەکەکێ دا، ژ بۆ ڤێ ژی ئۆجالان تێزێن جورا و جور ب ناڤێ زانستێ ژنناسی دروست کرینه‌، لێ یا راستی ھەروەک ئەو بخۆ د بێژیت: «بۆ رزگاربوونێ بوو ژ وێ بەلایا ب رێكا ژنێ ھاتییە سەرێ من و تەڤگەرا من».

«زەلام دل رەقە و بێ ئەخلاقە، وەک وێ چەندێ یە د قەفەسێ دا دگەل پلنگی بنڤی، تایبەت ئەگەر پلنگ یێ برسی بیت، مان دگەل زەلامی ژی ھەمان رەوشا پلنگێ برسی یە»

ئۆجالان د بێژیتە زەلامی ژی: «مان دگەل ژنێ سفکاتییە»

ئۆجالان ھەر ل دەستپێکێ دڤێت؛ ب درندەبوونا زەلامی ژ ئەگەرێ رەگەزێ وی، ژنێ ھۆسا رازی بکەت کو دگەل زەلامی زیان ب گیان و ئازادییا وێ دکەڤیت، ھەروەک ئەو بخۆ د بێژیت: «زەلام دل رەقە و بێ ئەخلاقە، وەک وێ چەندێ یە د قەفەسێ دا دگەل پلنگی بنڤی، تایبەت ئەگەر پلنگ یێ برسی بیت، مان دگەل زەلامی ژی ھەمان رەوشا پلنگێ برسی یە».

کومێدیا د ڤێرێ دایە ئۆجالان د بێژیتە زەلامی ژی: «مان دگەل ژنێ سفکاتییە، ئەز بخۆ ل گۆر ڤێ ستاتۆیا ھەیی ژیانا دگەل ژنێ، گەلەک کریت و پیس و خەلەت د بینم».

ئەڤە نەرینێن ئۆجالانی نه‌ ل دۆر ژنێ و زەلامی، پاشی بێ کو چ بەلگەیەکا زانستی و دیرۆکی بینیت جارەکا دی ژنێ دکەتە خودانا ھەمی داھینان و دەستکەفتێن دیرۆکی، لێ ب ھەبوونا زەلامی ئەڤ دەستکەفتێ ھەنێ یێ ژ دەست داین، لەوا دڤیت ژن شۆرەشێ بکەت، پەکەکە ژی ئەو شۆرەشەیە یا کو دڤیت ژن پشکداریێ تێدا بکەت، تەماشە بکەن ئۆجالان جار یێ ژنێ بلند دکەتە رێزا خوداوەندا، جارن ژی یێ ژیانێ دگەل ژنێ ب پیس و کرێت د بینیت، ئه‌رێ راستی ئەڤە زانستە؟ یان ژی ته‌خدیركرنا مەژی یە؟!

ل گۆری ئۆجالانی دەما ژن د بێژیت: «من حەزا گرێدانا پەیوەندیێ دگەل زەلامی ھەیه‌، ئەڤە دبیتە سەرنەکه‌فتنا ئەرکێن شورەشگێری».

چارەسەرییا ئۆجالانی ژ بۆ کو ژن خۆ ژ ڤێ چەندێ خلاس بکەت دڤیت، ژن بچیتە د پەرستگەھێن پەکەکێ و بۆ ماوەیەکێ درێژ دەست ب کرنۆشێ بکەت و بگەھیتە ژیەکی ژ عەقل و زانستێ ھەتا بگەھیتە رێزا خوداوەندا، لەوا ئۆجالانی د گوت: «پێدڤیە ژن حەزا سیکسی بکەتە دیلێ بلیمەتییا خۆ یا سەردەم».

ئانکو ل گۆری خەیال و ئەفسانەیێن ئۆجالانی ئەگەر ژن یا رژد بوو ل سەر ئازادیێ، وی دەمی دڤێت خۆ ل بەر ژیانەکا دژوار و بتنێ بگریت، دیارە ل ڤێرێ ژی دیسان ژ بۆ کو ژنێ سەردابەت و داغباری ژیانا زەحمەتا دگەل پەکەکێ بیت، ئۆجالان یێ د بێژیت: «ئاھا ھنگێ دێ بیە خوداوەند، ھەلبەت خوداوەند ژی پێدڤی ب چ زەواجا نینن»!

«ژن دڤیت سێکسی د ژیانا خۆ دا قەدەغەبکەن، ئەگەر نە ناگەھنە ئازادیێ»

ل ڤێرێ ھەرچەندە ھوین باش دزانن کو ھزرا ئۆجالانی یا دیرە ژ ئۆلی، لێ چونکی ئۆل ل ڤێرێ د بەرژەوندییا وی دایە، لەوا نەرین و یاسایێن دینی ل سەر قەدەغەکرنا پەیوەندییا ژن و زەلامی مەزن د نرخینیت، ھەر وەکی ئەو بخۆ د ژنۆلۆژی دا د بێژیت: «ھەلویستێ ب گومان یێ ئۆجالانی ل ھەمبەری پەیوەندییا سێکسی واتادارە».

ب کورتی ئۆجالانی سێکس گەلەکێ کرێت و عەیبدار کری، ژ بەر کو د بەرژەوەندییا وی دایە، دا پتر جوانێن کورد بکەتە سۆتەمەنییا ئایدۆلۆژییا خۆ، لەوا دبێژیت: «ژن دڤیت سێکسی د ژیانا خۆ دا قەدەغەبکەن، ئەگەر نە ناگەھنە ئازادیێ»!

دیارە ئەڤا ئۆجالان د ئازادیێ گەھشتی بەروڤاژی ھەمی وان رێکێن فیلۆسۆفی یە، ئەوێن کار ژ بۆ ئازادیێ دکرن، ئازادی تێگەھەکێ فیلۆسۆفی یە، کانێ چاوا ئازادییا ھزرێ ب خۆڤە دگریت، ھۆسا یا لەشی ژی بخۆ ڤە دگریت، بەس ئۆجالانی ئەڤ لایە ھەمی یێ ماندەل کری، یێ دبێژیتە ژنێ داکو تو ئازاد بی دڤێت نەبییە خودانا لەشێ خۆ، بەلکو دڤیت لەشێ خۆ بۆ شۆرەشێ و ئایدۆلۆژییا پەکەکێ تەرخان بکەی، ئەرێ ئەڤە ئازادییە یان ژی کۆلاتییە؟

پرسیار ئەوە ئەرێ ئۆجالان کەنگی سێکسی وەکی مافەکێ سروشتی بۆ ژن و زەلامی رەوا دبینیت؟

بێ گومان بەرسڤا ئۆجالانی یا زەلالە ئەو ژی دەما ژن دگەھیتە پلا خوداوەندیێ! یا سەیر ژی ئەوە دەما ژن دگەھیتە رێزا خوداوەندیێ، تا وی دەمی ئامادە نینە دگەل زەلامەکێ ژ پلا خو کێمتر زەواجێ بکەت!

ئەرێ پا چارەسەری چی یە ؟

زەلامێ رەبەن ژی دچاڤێ ئۆجالانی دا بخۆ کۆلەیە، لەوا دا ئەو ژی ژ ڤێ رەوشێ خلاس بیت پێدڤییە ببیتە عاریف و پلەیا عاریفبوونێ وه‌رگریت

چارەسەری ئەوە، ژن دگەل زەلامی «ھەڤژیانا ئازاد» دروست بکەت، بەس ل ڤێرێ ژی ئارێشەیەک ھەیە، ئەو ژی ئەوە زەلامێ رەبەن ژی دچاڤێ ئۆجالانی دا بخۆ کۆلەیە، لەوا دا ئەو ژی ژ ڤێ رەوشێ خلاس بیت پێدڤییە بیتە عاریف و پلەیا عاریفبوونێ ب دەستخۆڤە بینیت.

باش تەکەزێ بکەن بۆچی ئۆجالانی پەیڤا «عاریف» بکارئینا، عاریف ئانکو مەعریفا ئیلاھی ب دەستخۆڤە بینیت، نەگۆت زانست یان ژی ژنۆلۆژیا وی بخۆ نڤیسای، ئەڤ داخوازە رەنگە بۆ ھەوە یا سەیر بیت، بەس ئەڤە ژ بۆ وێ چەندێ یە، ژ بۆ کو زەلام ژی وەک ژنێ د پرۆسەیا خوداوەندیێ دا دەرباز ببیت و ببیتە خوداوەند، پاشی ل گۆر ئۆجالانی دەما مرۆڤ بوو خوداوەند، ئێدی دێ ژ کرێتی و عەیبا سێکسی رزگار بیت و پاشی پرۆسەیا سێکس وەکی گیانەوەران دێ ھێتە کرن سالێ جارەکێ، ئەڤە زانستێ ئۆجالانی یە، چارەسەریا وی د سەدێ 21 دا بۆ پرسا عەشق و جوتبوون و سێکسی ئەوە مرۆڤان بکەتە خوداوەند، خوداوەندبوونا مروڤان حەزەکا قەھرەمانێن ئەفسانەیی یێن دیرۆکێ یە، داکو ژ مرۆڤێن ئاسایی بهێنە جودا کرن، ئەگەر چ پشتی ھزاران سالان ژ نوو ئۆجالان یێ ڤێ داخوازێ دکەت، مرۆڤ ببنە خوداوه‌ند و یا سەیر ڤان نەرینان وەک زانست و مروڤناسی ددەتە دیار کرن!

پوستێن ھەمان بەش