PWK: بە ڕێزەوە یادی دکتۆر سادق شەرەفکەندی و هاوڕێکانی بەرز ڕادەگرین و دەوڵەتی ئێران شەرمەزار دەکەین.
پارتی وڵاتپارێزانی کوردستان (PWK) بە بۆنەی سی و سێهەمین ساڵوەگەڕی تیرۆرکردنی دوکتور سادق شەرەفکەندی سکرتێری گشتیی حیزبی دێموکراتی کوردستانی ئێران و هاوڕێکانی، پەیامێکی بڵاوکردەوە. PWK لە پەیامەکەیدا دەوڵەتی ئێرانی لەسەر ئەو “کۆمەڵکوژییە سیاسییە” شەرمەزار کردووە و ڕایگەیاندوە کە ناتوانرێ بە کوشتنی ڕێبەرانی کورد، ڕێگری لە دۆزی ڕەوای ئازادیی گەلی کورد بکرێت”.
دەقی پەیامی مەکتەبی ڕاگەیاندنی PWK:
دوکتور سادق شەرەفکەندی، سکرتێری گشتیی حیزبی دێموکراتی کوردستانی ئێران، لە 17ی ئەیلولی ساڵی 1992دا، لە شاری بەرلینی پایتەختی ئەڵمانیا، لەگەڵ فەتاح عەبدولی، ئەندامی کۆمیتەی ناوەندی و نوێنەری “پەدەکە-ئێران” و هۆمایوون ئەردەڵان، نوێنەری پەدەکە-ئێران لە ئەڵمانیا و نووری دێهکوردی، دۆستی پەدەکە-ئێران، بە فەرمانی ڕێژیمی ئێران و لەلایەن سیخوڕەکانی دەوڵەتی تارانەوە تیرۆر کران.
ئێمە جارێکی تر دەوڵەتی ئێران لەسەر ئەم کۆمەڵکوژییە سیاسییە ڕووڕەش و شەرمەزاری دەکەین.
دەوڵەتی ئێران بە لەسێدارەدانی پێشەوا قازی محەممەد و هاوڕێیەکانی، بە تیرۆرکردنی دوکتور عەبدولڕەحمان قاسملۆ و هاوڕێکانی و بە تیرۆرکردنی دوکتور سادق شەرەفکەندی و هاوڕێیانی، نەیتوانیوە کە ڕێگری لە دۆزی ڕەوای ئازادی گەلەکەمان لە ڕۆژهەڵاتی کوردستان بکات.
ئەو ئاڵایەی کە لە کاتی ڕاگەیاندنی “کۆماری کوردستان” لە گۆڕەپانی چوارچرای شاری مەهاباد هەڵکرابوو، ئەمڕۆ لە ڕۆژهەڵاتی کوردستان و لە هەموو پارچەکانی کوردستان بە دەستی خەباتگێڕان و زەحمەتکێشان و تێکۆشەرانی ڕێبازی ئازادیی کوردستانەوە دەشەکێتەوە.
لە 33هەمین ساڵەی شەهیدبوونی ئەو پاکڕەوانانەدا، ئێمە بە ڕێزەوە یادی دوکتور سادق شەرەفکەندی و هاوڕێکانی و سەرجەم شەهیدانی کوردستان بەرز ڕادەگرین.
