کۆمپانیەکا سەر ب پەیەدێ ڤە پەترۆلێ ژ بۆ رەژێما ئەسەد دشینیت

ل رۆژئاڤایێ کوردستانێ یەک ژ کۆمپانیێن سەر ب هەسەدێ ڤە کو پرانیا کارمەندێن وێ خزم و کەسێن نێزیکی هەڤسەرۆکێ پەیەدێ ئەنوەر موسلمن، پەترۆلێ ژ بۆی رەژێما ئەسەد دشینن.

چاڤکانیێن پێگەها دارکا مازی ل رۆژئاڤایێ کوردستانێ ئاشکەرا کر، کۆمپانیا ب ناڤێ زاگرۆس کو سەر ب هێزێن سووریا دەمۆکراتیک «هەسەدێ»یە، ژ مەها 4 یا سالا 2021ێ، عەمبارەکا تایبەت ب عەمبارکرنا پەترۆلێ ل رمێلانێ یا سەر ب باژارۆکێ دێرکێ دروست کریە و پەترۆلا خاڤ ژ ڤێ عەمبارێ ب رێیا تانکەران دشینیت باژارێ منبجێ یا سەر ب حەلەبێ، پشترا ب رێیا دەریێ ئوم جلوو یا سەر ب هەمان باژاری، دەرباسی ناڤچەیێن ل بن کۆنترۆلا رەژێما ئەسەد دا دکەت.

چاڤکانیێن پێگەها مە هەر وەها ئاشکەر ا کر، بارەگەها سەرەکە یا ڤێ کۆمپانیێ دکەڤیتە باژارێ کۆبانێ، کەسەکێ ب ناڤێ هەڤال حەسەن کو خەلکێ باژارێ کۆبانێ یە ڤێ کۆمپانیێ برێڤە دبەت و  پرانییا کارمەندێن وێ ژ باژارێ کۆبانێ نە.

ئەڤ کۆمپانیە ژ لایێ ئیداری ڤە ژ لایێ ئەنوەر موسلم، هەڤسەرۆکێ پەیەدێ ڤە دهێت برێڤەبرن و هەژمارا هەری زێدە یا کارمەندێن ڤێ کۆمپانیێ، خزم و کەسێن نیزیکی ئەنوەر موسلمن، ئەڤ یەک ژی بوویە سەدەما کارڤەدانان ژ لایێ گەلێ رۆژئاڤا ڤە.

گەلێ رۆژئاڤا ژ ئالیەکێ ژ بەر شاندنا پەترۆلێ ژ بۆ ی رەژێما سووریێ عاجزن، ژ ئالیەکێ دی ڤەژی ژ ڤێ یەکێ عاجز و نەرازینە کو پرانیا کارمەندان کەسێن نێزیکی بەرپرسێن پەیەدێ نە.