گرووپێن چەکدار باجەکا نوو ل سەر کوردێن عەفرینێ سەپاند

چەکدارێن گرووپا ئەمشات باجەکا نوو ل سەر کوردێن سڤیل یێن ل ناحیا شیێ یا عەفرینا رۆژئاڤایێ کوردستانێ سەپاندن.

چاڤکانیێن خوەجھی ژ عەفرینێ راگھاندن کو چەکدارێن گرووپا ئەمشات یێن سەر ب ئارتێشا ترکیێ ڤە، باجێن نوو ل سەر خەلکێ سڤیل ل ناحیا شیێ سەپاندنە.

ل سەر ڤێ یەکێ ھەر وەلاتیەکی کورد ئەگەر زێدەتر ژ 200 دارێن زەیتوونان ھەبن، دێ 500 دۆلارێن ئامەریکی وەکە باج ژێ هێتە ستاندن، ھەر کەسێ کو نەدەت ژی، دێ هێتە ئیشکەنجەدان ھەیا کو وێ باجێ بدەت.

ھەروھا ل عەفرینێ چاڤکانیێن خوەجھی دیار کرن کو لیوایا مونتەسر بیلاھ ب فەرمانداریا ئەبوو مالک ئەل-دێری، کو د ناڤا رێزێن ئەحرار ئەل-شەرقیە دا بوو، ژ بەر ناکۆکیێن ناڤخوە ل سەر دەستھلات و دابەشکرنا کەلووپەلێن دزیێ ژێ جودا بوو.