ھەنگاو: د سالا 2022یێ دە ھەری کێم 290 کۆلبەر ل سینۆرێن کوردستانێ بوون قوربانی

رێخستنا مافێ مرۆڤ یا ھەنگاو راپۆرتەک بەلاڤ کر کو د سالا 2022یێ دە ھەری کێم 290 کۆلبەر و کاسبکارێن کورد ل سینۆرێن کوردستانێ بوونە قوربانی کو 46 کەس ژ وان جانێ خوە ژ دەست دان و 244 کەس ژ وان ژی بریندار بوونە. ئەڤ ئامارە ل گەل سالا پێشتر دەما کو تێ موقایەسە کرن 75 بوویەر ئانکو سەدی 35 زێدەترە ژ سالا بۆری.

ل گۆر راپۆرتا ھەنگاو: پرانیا قوربانیان کو 209 کەس ژ وان ب گولـلەیێن راستەراست یێن ھێزێن ئەولەھیا ئیرانێ یان ھاتنە کوشتن، یان ژی بریندار بوونە. ھەروھا 35 بوویەرێن ژ بەر کارەساتێن خوەزایی یێن وەک ژ زنار و پەساران دە کەتن، خەنقینا د چەم دە، لێدانا برووسکێ، رەنیێ و قەرسینێ ژیانا خوە ژ دەست دانە یان ژی بریندار بوونە.

ھات راگەھاندن کو کوشتن و برینداربوونا کۆلبەران یا ب گولـلەیێن راستەراست یێن ھێزێن چەکدارێن ئیرانێ د سالا 2022یێ دە دەما سالا بۆری یا 2021ێ ڤە بێ موقایەسە کرن 69 بوویەر ئانکو سەدی 49 زێدە بوویە. ھەروھا رێژەیا وان کۆلبەرێن کو ژ بەر تەقینا مینان بوونە قوربانی ژی سەدی 300 بلند بوویە.

ب گولـلەیێن راستەراست یێن ھێزێن ئیرانێ ڤە: 209 کەس (33 کەس ھاتنە کوشتن و 176 کەس ژی بریندار بوونە) کو دبە سەدی 72.5ێ بوویەران.

بوویەرێن خوەزایی: 35 بوویەرن 8 کەس ھاتنە کوشتن و 27 کەس ژی بریندار بوونە، کو دبە سەدی 12.5ێ گشتی یێ بوویەران.

تەقینا مین: 12 بوویەرن و 13 کەس بریندار بوونە، کو دبە سەدی 4ێ گشتی یێن بوویەران.

بوویەرێن ھاتووچوونێ: 25 بوویەرن، کەسەکی ژیانا خوە ژ دەست دایە و 24 کەس ژی بریندار بوونە و دبە سەدی 8.5ێ گشتی یێ بوویەران.

شەوات و شەواتا ژ بەر گازێ: 5 بوویەرن، 4 ژ وان جانێ خوە ژ دەست دانە و کەسەک ژی بریندار بوویە و دبە سەدی 2 یێ گشتی یێ بوویەران.

لێدان و ئیشکەنجە: 4 بوویەرن و ھەر چار کەس بریندار بوونە، کو دکە سەدی 1.5 گشتی یێ بوویەران.

ل گۆر ڤێ راپۆرتێ ھەژمارا وان کۆلبەرێن کو د سالا 2022یێ ل سینۆرێ پارێزگەھا کرماشان بوونە قوربانی 162 بوویەرە، کو ل گۆر سالا بەرێ بێ موقایەسە کرن 58 بوویەر ئانکو سەدی 211.5 بوویەر زێدە بوویە و ل ھەمبەر وێ ژی ئەو کۆلبەرێن کو ل سینۆرێ پارێزگەھا ئورمیێ بوونە قوربانی 20 بوویەر بوونە کو ل گۆر سال پێشتر سەدی 60 کێم کریە.

پارێزگەھا ئورمیە: 20 بوویەر، کو 13 کەس ھاتنە کوشتن و 7 کەس ژی بریندار بوونە.

پارێزگەھا سنە: 108 بوویەر، کو 22 کەس ھاتنە کوشتن و 7 کەس ژی بریندار بوونە.

پارێزگەھا کرماشان: 162 بوویەر، کو 11 کەس ھاتنە کوشتن و 151 کەس بریندار بوونە.

ئاماژە ب وێ یەکێ ژی ھاتیە کرن کو سالا 2022یێ دە ھەری کێم 11 زارۆکێن کۆلبەر کو تەمەنێ وان بن 18 سالی دە بوویە بوونە قوربانی.

ل گۆر ڤێ راپۆرتێ 4 کۆلبەرێن زارۆک ژیانا خوە ژ دەست دانە و 7 ژ وان ژی بریندار بوونە. 4 کۆلبەرێن زارۆک ب گولـلەیێن راستەراست یێن ھێزێن چەکدارێن ئیرانێ، 2 کۆلبەر ژی ژ بەر کەتنا ژ زناران و لێدان و ئیشکەنجەیا ژ ئالیێ ھێزێن ئیرانی ڤە، کۆلبەرەک ژی ب تەقینا مین، 3 کۆلبەر ژی ژ بەر شەواتێ و کۆلبەرەک ژی ژ بەر رەنیا بەرفێ بوونە قوربانی.