گۆتیرێس: ژ بۆ سبەرۆژەکە گەش، نەتەوێن یەکگرتی پشتەڤانیا هەرێما کوردستانێ دکە

سەکرەتەرێ گشتیێ نەتەوێن یەکگرتی ئانتۆنیۆ گۆتیرێس راگهاند، ئه‌و كێفخوه‌شه‌ كو وی سه‌ردانا هه‌رێما كوردستانێ كری یه و گۆت: ژ بۆ سبەرۆژەکە گەش، نەتەوێن یەکگرتی پشتەڤانیا هەرێما کوردستانێ دکە.

ئیرۆ پێنجشەمێ 2ێ ئادارا 2023ان، سەکرەتەرێ گشتییێ نەتەوێن یەکگرتی ئانتۆنیۆ گۆتیرێس ل هەولێرێ د کۆنفەرانسەکە رۆژنامەڤانی دە راگهاند: «ئەز کێفخوەشم کو هاتمە هەرێما کوردستانێ».

ئانتۆنۆ گۆتیرێس دیار کر، بودجەیا فەدەرال و مژارا پەترۆل و گازێ، دڤێ رێکەفتن ل سەر وان وەرە کرن و هەروها دڤێ رێکەفتنا شنگالێ وەرە جیبجیکرن.

گۆتیرێس گۆت: «ئەز ل ئیراقێ مە، تشتێ ل ڤی وەلاتی رووددە، ژ بۆ هێڤیێ چاڤکانی یە».

هەروها دەستنیشان کر کو ئەو پارتیێن سیاسی یێن هەرێما کوردستانێ هان ددە کو ئیسال هلبژارتن وەرە ئەنجامدان و گۆت، گهیشتنا سبەرۆژەکە گەش، پێویستیا وێ ب پێنگاڤێن ئیرۆ هەیە.

سەکرەتەرێ گشتییێ نەتەوێن یەکگرتی ئانتۆنۆ گۆتیرێس دیار کر، ژ بۆ سبەرۆژەکە گەش، نەتەوێن یەکگرتی پشتەڤانیا هەرێما کوردستانێ دکە.

ئانتۆنۆ گۆتیرێس گۆت: «ئەز کێفخوەشم کو لگەل سەرۆکێ هەرێمێ، سەرۆکوەزیر، جیگرێ سەرۆکوەزیر و سەرۆکا پارلامەنتۆیا کوردستانێ جڤیام».

هەروها گۆت: «مە لگەل رایەدارێن ئیراقێ، بەهسا رێکەفتنا ناڤبەرا هەولێر و بەغدایێ کر ل سەر یاسایا پەترۆل و گاز و بودجەیێ، هەروها مە بەهسا بریارێن دادگەها فەدەرالی کر، کو دڤێ د بەرژەوەندیا هەموو گەلێ ئیراقێ دە بە».

دەربارێ پێوەندیێن دیرۆکی یێن ناڤبەرا گۆتیرێس و هەرێما کوردستانێ دە، سەکرەتەرێ گشتییێ نەتەوێن یەکگرتی دبێژە: «د ئەنجاما وان کارەساتێن کو ب سەر کوردان دە هاتن، ئەم لگەل برێز جەلال تالەبانی و برێز مەسعوود بارزانی بوون وەک هەڤال».