دهۆک – ل دژی حکوومەتا ئیراقێ خوەپێشاندان هات کرن

ب ھەزاران وەلاتیێن دوھۆکێ ئیرۆ سێشەمبێ 5 ئیلۆنا 2023، ل دژی بریارێن حکوومەتا نھا یا ئیراقێ و نەشاندنا مافێن دارایی یێن ھەرێما کوردستانێ کو د یاسایا بوودجەیا گشتی یا سالا 2023 و 2024 دە ھاتیە دیارکرن، خوەپێشاندان کرن.

خوەپێشاندان ل دژی بریار و سیاسەتا حکوومەتا ئیراقێ یا ل ھەمبەر ھەرێما کوردستانێ و شەھیدکرنا وەلاتیێن کورد ل کەرکووکێ، ل پارکا نەورۆزێ ب بەشداریا چین و پێکھاتەیێن جودایێن باژارێ دوھۆکێ ھاتە کرن.

خوەپێشاندەران داخواز ژ حکوومەتا ئیراقێ کرن کو پابەندی دەستوور و یاسایا بوودجەیا فەدەرال ببە و رێکەفتنێن خوەیێن لگەل حکوومەتا ھەرێما کوردستانێ جیبجی بکە.

ئارمانجا ڤێ خوەپێشاندانێ، گھاندنا پەیامەکێ بۆ ئالیێن سیاسی یێن ھەرێما کوردستانێ و جڤاکا ناڤدەولەتی کو فشارێ ل حکوومەتا ئیراقێ بکن، دا کو سیاسەتا خوە ل ھەمبەر ھەرێما کوردستانێ بگوھەرە.

پشتی کو ئالیگرێن حەشدا شەعبی ل دژی رادەستکرنا بارەگەھێن پارتیا دەمۆکراتا کوردستانێ (پەدەکێ) 5 رۆژان رێیا کەرکووک-ھەولێرێ گرتبوون، وەلاتیێن کوردێن کەرکووکێ رۆژا 2 ئیلۆنێ نەرازیبوونا خوە د خوەپێشاندانەکێ دە نیشان دان و داخوازا ڤەکرنا رێ کرن.

د ئەنجاما بەرسڤدایینا ھێزێن ئاساییشا کەرکووکێ دە، کو د وان 5 رۆژان دە ئالیگرێن حەشدا شەعبی دپاراستن، ب گولـلەیان دەستێوەردانا خوەپێشاندانا کوردان کرن و د ئەنجامێ دە 4 وەلاتیێن کورد شەھید بوون و 15 وەلاتیێن دن ژی بریندار بوون.

گۆت ژی: حکوومەتا ئیراقێ بریار دایە کو مەھانە تەنێ 500 ملیار دینار ژ بۆ مووچەیێن حکوومەتا ھەرێما کوردستانێ بشینە، لێ ھەمبەرێ پێویستیا ھەرێما کوردستانێ ب 940 ملیار دیناران ھەیە و پەرەیێ کو حکوومەتا ئیراقێ دشینە تێرا دابەشکرنا مووچەیان ناکە.