جنێد سەید مەجید کو ژ 16ێ تەباخا بووری ڤە ھاتیە گرتن، ھەیا رۆژا ئیرۆ، نە سەدەمێن کو پێ ھاتیە گرتن دیار بوونە، نە ژی ئاگاھی و زانیاری ل سەر چارەنڤیسا وی دیارن.
بەریا نھا رێخستنا دەنگێ گرتیان، ل سەر رووپەلا خوە ل سەر تۆرێن جڤاکی داخویانیەکا تایبەت ب ناڤبووری بەلاڤ کر، تێ دە ژ پەیەدێ خوەست د زووترین دەم دە چارەنڤیسا وی دیار بکە و سەربەست بەردە.
دەنگێ گرتیان ھەر وەھا پشتراست کر کو ژ ئالیێ ئاساییشا پەیەدێ ڤە ل گرکێ لەگێ ھاتیە گرتن، تەڤی کو بەریا نھا 2 جاران ھاتیە گرتن و بنچاڤکرن، چارەنڤیسا وی نە دیارە، رێخستنێ ژ پەیەدێ خوەست وی رادەستی دادگەھەکا دادپەروەرانە یا ناڤدەولەتی بکە، و رێ بدە کو مالبات و کەسووکارێن وی سەردانا وی بکن و ئەگەر ب چ تاوانەکێ رانەبوویە کو پێ بهێت زیندانیکرن، دڤێت یەکسەر سەربست بەردە.
دەنگێ گرتیان بانگا خوە ئاراستەی رێخستنێن مرۆڤی و مافپەروەری یێن خوەجھی و ناڤدەولەتی کر کو دەستێوەدانێ بکن و وی سەربەست بەردن.
جنێد سەید مەجید کو وەکە ئەندامێ ئەنجوومەنا ھەرێمی د ناڤا پارتیا خوە دە پەدەکە-سێ جھ دگرە، د ھەمان رۆژا کو رۆژنامەڤان بەرزان حسێن کو ئەو ژی د ناڤا ھەمان پارتیێ دە رۆژنامەڤانە، ل گرکێ لەگێ ھاتە گرتن، د 30 ئیلوونێ دە چەکدارێن پەیەدێ رۆژنامەڤان بەرزان ھسێن سەربەست بەردا، تەڤی بانگێن بەردەوام ژ ئەنجوومنا نشتیمانی یا کوردی، چالاکڤان و رێخستنان ڤە بۆ ب داوی ئانینا ڤان کریار و بنپێکران، پەیەدە ل سەر پلانا خوە رژدە، و ھەر دەم و دەمەکێ ئەندام، و ئالیگرێن ئەنەکەسێ و پارتیێن د ناڤ دە دکە ئارمانج و بن چاڤ دکە، ئەنەکەسە ژی تەکەز دکە کو ئەڤ کریار بەرێ شێنیێن کورد ددە کۆچبەریێ و دڤێت سینۆرەک ژ بۆی ڤان کاران بهێت دانین.
