بالافرێن شەری یێن ترکیێ بارەگەھەکێ پەکەکێ ل سنۆرێ شنگالێ بۆمبەباران کر

بالافرێن شەری یێن ترکیێ ل ناحیەیا سنوونێ یا قەزایا شنگالێ بارەگەھەکێ چەکدارێن پەکەکێ دکە ئارمانج.

دۆھ رۆژا دوشەمبێ، 13ێ مژدارا 2023ێ، بالافرێن شەری یێن ترکیێ ل دوریانا زیراعە یا ناحیەیا سنوونێ ل قەزایا شنگالێ بارەگەھەکێ چەکدارێن پەکەکێ کریە ئارمانج.

ل گۆر زانیارێن دەستپێکی، کوشتی و بریندار د ناڤ رێزێن چەکدارێن پەکەکێ دە د وی بارەگەھی ڤە ھەنە.

ھەوالگریا ترکیێ رۆژا ئینێ، 6ێ جۆتمەھا 2023ێ، پارڤە کربوو کو وان د ئۆپەراسیۆنەکا تایبەت دە بەرپرسەکی پەکەکێ ب ناڤێ ئلیاس برۆ عەلی ل شنگالێ کوشتبوو و تەکەز کربوو کو دێ ل سەر لێدانا بنگەھێن چەکدارێن پەکەکێ ل ئیراق و سووریەیێ بەردەوام بن.

ھەروەسا ھەفتیا بۆری دژەتەرۆرا کوردستانێ ژی راگەھاندبوو، “ل رۆژا دوشەمبێ، 6ێ مژدارا 2023ێ، دەمژمێر 11:15 بەری نیڤرۆ، درۆنێن ئارتێشا ترکیێ کۆمەکا چەکدارێن پەکەکێ ل گوندێ بۆسکێنێ یێ گرێدایی قەزایا رانیایێ یا ئیدارەیا راپەرینێ کر ئارمانج”.

ل 26ێ جۆتمەھا 2023 ژی، قایمەقامێ قەزایا سیدەکانێ ب وەکالەت ئێحسان چەلەبی راگەھاندبوو، “شەڤا بۆری ئارتێشا ترکیەیێ ب رێیا درۆنان دو ترومبێل ل گوندێن بێجوانان و داسنی یێن قەزایا سیدەکانێ کرنە ئارمانج. ل گۆر زانیاران، ئەو ھەردو ترومبێل یێن چەکدارێن پەکەکێ بوونە”.