دۆزا ڤارتینیسێ بێی کو کەسەک سزای وەربگرە ھات گرتن: 9 کەس ھاتبوون شەوتاندن

دۆزا “کۆمکوژیا ڤارتینیسێ” کو تێ دە 7 ژێ زارۆک 9 کەس ھاتبوون کوشتن ژ بەر بۆرینا دەمی ھات ھلوەشاندن.

ل گوندێ ڤارتینیسێ یێ گرێدایی ناڤچەیا بەرانکێ یا مووشا باکورێ کوردستانێ 30 سال بەری نھا ژ ھەمان مالباتێ 9 کەس ھاتبوون کوشتن.

رونشتنا 20 یا دۆزا  وێ کۆمکژیێ دوهی ل دادگەھا سزایێن گران یا باژارێ کرککالەیێ یێ ترکیەیێ ب رێڤە چوو.

دادگەھێ ب بەهانەیا کو د سەر بوویەرێ را 30 سال و 2 مەھ دەرباس بوونە، دۆز ھەلوەشاند و دۆسیە بێی کو کەسەک سزای وەربگرە ھات گرتن.

ل گوندێ ڤارتینیسێ یێ ناڤچەیا بەرانکا پارێزگەھا مووشا باکورێ کوردستانێ 3 چریا پێشین یا 1993 لەشکەرێن ترکیەیێ ئاگر بەردان خانیێ مالباتەکا کورد. ژ ھەمان مالباتێ 7 ژێ زارۆک 9 کەسان جانێ خوە ژ دەست دا.

د کۆمکوژیێ دە محەمەد ناسر ئۆگوت، ئەشرەف ئۆران ئۆگوت، سەڤدا ئۆگوت، سەڤم ئۆگوت، محەمەد شاکر ئۆگوت، محەمەد شرن ئۆگوت، ئایجان ئۆگوت، جیھان ئۆگوت و جنال ئۆگوت جانێ خوە ژ دەست دا.

ژ مالباتا ئۆگوت ب تەنێ کەچەک ساخ مایە کو ئەو ژی وێ شەڤێ نە ل مالێ بوو.

تۆمەتبارێ سەرەکی بولەنت کاراۆگلو کو وێ دەمێ فەرماندارێ جەندرمەیێن وێ دەڤەرێ بوو خانەنشینە و ساخە لێ ئەڤ 30 سالن چ دادوەر و دۆزگەر نکارن وی دەرخن پێشیا دادگەھێ.

پارێزەرێن دۆسیەیێ دان خویاکرن کو ئەو دێ بەردەوام کار ل سەر ڤێ دۆسیێ بکن، دێ سەری ل دادگەھا دەستوورا بنگەھین یا ترکیەیێ و دادگەھا مافێن مرۆڤان یا ئەورۆپایێ بکن. 

تیما پارێزەران د کۆنفەرانسەکا رۆژنامەڤانیێ دە رەخنە ل دەستھلاتا دادوەریێ گرت کو د ڤێ دۆسیەیێ دە دادپەروەرانە کار نەکریە.

تیما پارێزەران دیار کر کو چەند داخوازیێن وان ل سەر ڤێ مژارێ ھەبوون لێ نەھاتنە بجھکرن و دەستھلاتێن دادوەریێ تۆھمەتبارێ سەرەکی نەگرت ھەتا کو رەڤیا.

ب لیستا سۆر ل تۆمەتبارێ سەرەکی فەرماندارێ ھێزێن جەندرمایان یێ وێ دەمێ بولەنت کاراۆگلو دگەرن و بریارا گرتنا وی ژی ھەیە لێ نایێ گرتن. ئەو هێژان ژی مووچەیێ خوە یێ خانەنشینیێ ژ بانکەیان وەردگرە و دیارە تێ پاراستن.

دۆزێن کو 30 سال د سەر وان رە دەرباس دبن و تۆمەتبارێن وان نەیێنە گرتن ئانگۆ بێ ئەنجام بمینن، دکەڤن بەر دەما درێژ و تێنە گرتن.