ل عەفرینێ کەسەک ھات کوشتن و 4 کەس ژی ھاتن رەڤاندن

ل ھەرێما عەفرینێ 4 کەس ژ ئالیێ گرۆپێن چەکداران ڤە ھاتن رەڤاندن و کەسەک ژی ل نێزیکی باژارۆکێ نبلێ ھاتە کوشتن.

رێخستنا مافێن مرۆڤان ل عەفرینێ بەلاڤ کر، گرۆپا ب ناڤێ “پۆلیسێن لەشکەری” رۆژا 25 ڤێ مەھێ خۆرتێ ب ناڤێ شابان رەشید حەمۆ ل سەر رێبەندا باژارێ عەفرینێ رەڤاند.

راگھاند ژی، ھەمان گرۆپا “پۆلیسێن لەشکەری” رۆژا 24 ڤێ مەھێ وەلاتیێ ب ناڤێ حەنان شێخ فەخری ل سەر رێبەندا تاخا مەحموودیێ یا باژارێ عەفرینێ رەڤاند.

رێخستنا مافێن مرۆڤان دیار کر ژی، گرۆپا پۆلیسێن لەشکەری رۆژا 21 ڤێ مەھێ وەلاتیێ ب ناڤێ عەبدۆ محەمەدێ ژ گوندێ دارگرێ یێ ناڤچەیا مابەتا رەڤاند.

ھەروھا دا زانین، چەکدارێن گرۆپا سلێمان شاھ (ئەمشات) رۆژا 25 بەرچلە کەسێ ب ناڤێ ئەحمەد دەمرجی ژ گوندێ مەروانیێ یێ سەر ب ناڤچەیا جندرێس ڤە رەڤاند.

رێخستنا مافێن مرۆڤان بەلاڤ کر ژی، گرۆپەکا چەکدار یا ژ باژارۆکێ نبلێ ب مەبەستا دزیێ، وەلاتیێ کورد خالد جەمیل نەبۆ د ناڤبەرا نبل و گوندێ برجکێ دە، د ناڤا ئۆتۆمۆبیلا وی دە ب گولـلەیان کوشتن.

دیار کر ژی، خالد جەمیل نەبۆ ژ گوندێ کیمارێ یێ ناڤچەیا شێرەوایا عەفرینێ یە و پشتی کو گوندێ وی ژ ئالیێ ئارتێشا ترکیەیێ و گرۆپێن چەکدار ڤە ھاتبوو داگێرکرن، کۆچبەری گوندێ برچکێ بووبوو.

ئارتێشا ترکیەیێ و گرۆپێن چەکدار ژ ئادارا 2018 ڤە ھەرێما عەفرینێ داگیر کرنە، لێ 12 گوندێن ناڤچەیا شێرەوایێن نێزیکی ھەر دو باژارۆکێ شیە (نبل و زەھرا) د دەستێ ھەسەدێ دە مانە.