ژ بۆ پێشکێشکرنا ئالیکاریا تەندروستی ژ بۆی خەلکێ گوندەوارێ عەفرینێ، ناڤەندا پزیشکی یا گەرۆک یا دەزگەھێ خێرخوازی یا بارزانی رۆژانە سەردانا گوندان دکە و رەوشا نەخوەشان دشۆپینە. خەلکێ عەفرینێ دبێژن، ژ دەما ھاتنا دەزگەھا خێرخوازیا بارزانی ڤە، بارێ وان سڤک کریە.
دەزگەھێ خێرخوازی یێ بارزانی ل عەفرینێ، ناڤەندەکا بژیشکی یا گەرۆک دگەل تیمەکا پزیشک و کارمەندێن تەندروستیێ ئاڤا کریە و ل گوندێن عەفرینێ دگەرن و ئالیکاریێن پزیشکی و دەرمانان ژ بۆی نەخوەشان پێشکێش دکن.
ئەنداما دەزگەھێ خێرخوازی یێ بارزانی در. جیھان بەکۆ راگهاند: “ئەم ھەول ددن خوە بگھینن ھەموو گوندێن عەفرینێ و خزمەتێن پزیشکی ژ بۆی نەخوەشان پێشکێش بکن. خەلکێ عەفرینێ ژ بەر رەوشا شەر و ئەردھەژێ، پێویستیا وان ب ئالیکاریێ هەیە، ب تایبەت گوندێن ژ ناڤەندا باژارێ عەفرینێ دوورن، ژ بەر وێ ئەم ھەول ددن کو خوە بگھینن وان گوندان و خزمەتێن پزیشکی ژ چارەسەری و دەرمانان ژ بۆی وان پێشکێش بکن.”
ل گوندەوارێ عەفرینێ رەوش زەحمەتە، خالێن پزیشکی کێمن و دەرمان یان نینە یان ژی ھەبە، گەلەکی گرانە. ناڤەندا پزیشکی یا گەرۆک یا دەزگەھێ خێرخوازی یێ بارزانی بۆ خەلکێ وێ ناڤچەیێ، گاڤەکا گرنگە و جھێ دلخوشیا خەلکێ کو دبێژن، دەزگەھێ خێرخوازی یێ بارزانی، گەلەکی بارێ وان سڤک کریە.
