ھەڤسەرۆکێ دەم پارتێ ل دھێ بوو کویرھا دەرەوان!

ھەڤسەرۆکێ دەم پارتیێ سەرەدانا دھێ کر و ژ بۆ پرۆپاگاندەیا پارتیا خوە ئاخاڤتنەک کر. بانگی خەلکێ دھێ کر کو دەنگا نەدن بەربژێرێ ئاکەپێ و بدن یێ دەمێ. سەردانا باکرھان یا دھێ و ئاخاڤتنا وی د ANFێ دە وەک نووچەیەکی جھ گرت. تێ زانن کو ANF ئاژانسا نووچەیا یا پەکەکێ یە و ل گۆرا پرۆپاگاندەیا پەکەکێ وەشانا خوە دکە.

نووچەیا ANFێ وھا دبێژە:

 باکرھان، دەستنیشان کر کو کاندیدێن دەم پارتیێ ژ بۆ خزمەتا گەل ب رێ کەتنە و وھا درێژی دا ئاخافتنا خوە: “ھەکە ھەڤشارەدارێن مە خەلەتیەکێ بکن ئەول ئەم دێ ژ وان حەسابێ بپرسن. ژ بۆ چاند و زمانێ خوە ھەنە. ھوون ھەموو یەعقووب ئاغا دزانن. د سالا 1926 دە ژ بۆ گەلێ کورد مافێن خوە یێن دەمۆکراتیک بدەستبخە تێکۆشیا، جھەکی گۆرا وی ژی نینە. ئیرۆ نەڤیێ یەعقووب ئاغا ھاتیە ل دژی دەم پارتیێ بوویە کاندید. لگەل کەسێن کو نکارن جھێ گۆرا وی ژی نیشان بدن، لگەل ڤێ سیستەمی دخەبتن. دبە کو ئەم نە نەڤیێن یەعقووب ئاغا بن لێ ئەم ھەڤرێیێن فکرا وی نە. ل دھێ ئەم ئالایێ وی ھلدگرن. ژ کەرەما خوە ھوون ژی کەسێن د ناڤ ئاکەپێ دە جھ دگرن ھشیار بکن. مالا کوردان دەم پارتییە. ھەکە کورد ھەبە تێ مالا خوە. ل ڤر ژ بۆ کو ژ ئێشا ڤی گەلی رە ببە مەلحەم تێدکۆشە. ئەم ل بەر بیرئانینا یەعقووب ئاغا ب رێزداری بەژنا خوە دتەوینن. ئەز بانگێ نە ل نەڤیێ یەعقووب ئاغایێ بوویە کاندید دکم لێ ژ خزمێن وی یێندن رە بانگ دکم، دەنگێ خوە بدن کاندیدێن دەم پارتیێ و خوەدی ل میراسێ یەعقووب ئاغا دەرکەڤن.”

ژ بەری ھەر تشتەکی باکرھان دەرەوا دکە و ئەو دەربارێ یەعقووب ئاغا دە تشتەکی نزانە. راستە کەمالیستا یەعقووب ئاغا کوشت. بەلکی ژ بەر وێ ژی ئیرۆ نەڤیێ وی نە پارتیەک کەمالیست دە بوویە بەربژێرێ شارەداریا دھێ. گەلۆ د کوشتنا یەعقووب ئاغا دە باکرھان ژی نە وەک کەمالیستان دفکرە؟ باکرھان ل دھێ ژ بۆ چەند دەنگا وەرگرێ دەرەوا دکە. دۆھ جاردن باکرھان دگۆت، ئەم ل تەکۆشینا شێخ سەعید خوەدی دەردکەڤن. لێ نە راستە ئەو ل دژی ھەموو سەرھلدانێن کوردا بوون و سەرۆکێ وان ئۆجالان سەرھلدانێن کوردا وەک لەیزتکا ئەمپەرلایستان دنرخینە و کوردا ژ بۆ دژێ کەمالیستان سەری ھلدان ب پێشڤەرووتیێ تاوانبار دکە.

ئەگەر باکرھان دروستبە دێ ئەولێ گۆتنێن عەڤدللا ئۆجالان د دەربارێ شێخ سەعید و سەرھلدانێن کوردان دە تەکزیب بکە. بلا ھنگێ بەحسا سەرھلدانا بکە . ئەو دەرەوا دکە .

دھێ ژ بۆ پەکەکێ گەلەکی گرینگە. ھلبژارتنێن بەرێ نەڤیێ یەعقووب ئاغا سەرکەتنەک دەستڤە ئانی و دھێ ژ داگیرکەریا پەکەکێ خلاس کر. نھا جاردن بەربژێرە و ل گۆرا لێکۆلنێن تێنە کرن، دێ جاردن سەربکەڤە.

کورد و کوردستان ب تەنێ دەما ھلبژارتنا تێ بیرا دەمێ. داخویانیێن رەڤەبەرێن پەکەکێ ئەساسن. کاراسو ڤەکری فەرمان دا دەمێ کو، ل گەل سۆسیالیستان، ل گەل کەمالیستان ھەڤکاریێ بکن. نھا سیاسەتا کو ھەڤسەرۆکێ دەمێ رێڤە دبە، کوردا نکارە بخاپینە.

کا بەرێ خوە بدنێ، عەڤدللا ئۆجالان سەرۆکێ باکرھان د دەربارێ سەرھلدانێن کوردان دە چ گۆتیە:

ئۆجالان د دەربارێ سەرھلدانێن کوردا دە دبێژە:

د ھەژمارا 222 یا کۆڤارا سەرخوەبوونا خزیرانا 2000 دە ب سەرناڤێ “نرخاندنا سەرۆکێ پەکەکێ رێھەڤال عەڤدللا ئۆجالان” تشتێن کو ئۆجالان ل سەر شێخ سەعید دفکرە ھاتە وەشاندن. ئۆجالان دبێژە:

“دڤێت دیرۆکا سەرھلدانان باش بهێت زانین و راست بهێت فێم کرن. سەرھلدانێن بەرێ ل سەر بنگەھا نەتەوەپەرەستیا پاشڤەروو بوون. دبە کو ھندەک ببێژن ئەز بەر ب کەمالیزمێ ڤە دچم. دژمناتیا کەمالیزمێ نە ل خێرا کوردانە. سەرھلدانێن پێشی یێن کوردان ل رۆژئاڤا ھاتن ئاڤاکرن. تشتا کو من دخوەست ببێژم ئەڤ بوو: وێ دەمێ ئەمپەریالیزمێ ھەم ل سەر کوردان و ھەم ژی ل سەر ترکان لیستک دلیست. یێن کو د وێ دەمێ دە پێشەنگیا سەرھلدانان کرن، نەکارین ڤێ یەکێ ببینن. پێویستە ئالیێن رەئاکسیۆنێ یێن رێبەرتیێ بێن دیتن. ئەڤ لیستک ھێ ژی بەردەوام دکە.

“سەرھلدان نێزیکاتیا دەستھلاتدارێن کوردە. دڤێت بالا بارزانی و تالابانی بێ کشاندن. یێ کو گەلێ کورد و کەمالیزمێ ئانینە ڤێ رەوشێ، سەرھلدانێن کوردانە. دڤێت پرتووکا دۆغو پەرینچەک یا کو بەحسا سەردەما 24-1919 دکە بێ خوەندن. مستەفا کەمال دا د سالا 1919 دە ھەموو ئازادیان بدە کوردان. موستافا کەمال ژ کوردانرە گۆت: “نەکەڤن بەر فێلبازیێ. نەیێن لیستکا ئاڤاکرنا دەولەتا کوردستانێ، نەکەڤن لیستکا ئاڤاکرنا دەولەتا ئەرمەنیستانێ. ب کۆمارێ رە دا ھەموو ئازادیێن کوردان هێنە ناسکرن. راستە، ئەتاتورک ب پەرسپەکتیفەکا ستراتەژیک نێزکی وێ بوویە. ڤێ یەکێ ھەتا سالا 1924 دۆم کر.

“سەرھلدانا شێخ سەعید ژ بۆ کو کورد قەرەبوویان وەرگرن، ئاڤێتن ناڤ ئاگری. ئەڤ سەرھلدان ژ بۆ کوردان بوو فەلاکەتەکا مەزن. بارزانی و تالابانی ب ڤی ئاوایی دەرکەتن ھۆلێ. ب نامووسا کوردا ھات لیستن و ئەو ئاڤێتن ناڤ ئاگری.”

راستی ئەڤەیە، ل گۆرا پەکەکێ دیرۆکا کوردان ب وان دەستپێکریە..ژ بەری خوە تشتەکی قەبوول ناکن. ئیرۆ د قادا سیاسەتێ دە ب سەختەکاریان و دەرەوان هێشتا خوە ل سەر ڤی ملەتی فەرز دکن.