سەرۆکێ پارتیا ئینسان و ئازادی ئەحمەد کایا ل دیاربەکرێ ھات بنچاڤکرن

 سەرۆکێ پارتیا ئینسان و ئازادی (PÎA) ئەحمەد کایا ل دیاربەکرێ ھات بنچاڤکرن.

ل گۆر ئاگاھیان، پۆلیسێن دیاربەکرێ ئیرۆ 8 خزیرانێ دانێ سبێ ب سەر مالا سەرۆکێ پارتیا ئینسان و ئازادی ئەحمەد کایا دە گرتن و ئەو بنچاڤ کرن.

برایێ ئەحمەد کایا، تارق کایا ژ پەمیانەرێ کوردستان24ێ رە گۆت: “پۆلسان ژ مە رە گۆتیە ئیفادەیەکا وی ھەیە، لێ بەلێ ئەم دبێژن نە تەنێ ئیفادەیە تشتەکە دن ھەیە.”

پارتیا ئینسان و ئازادی یا کو 7 سال بەرێ داخوازنامەیا دامەزارنادنێ دابوو وەزارەتا کارێن ناڤخوەیی یا ترکیەیێ ژ بەر کو دەستویریا دامەزراندنێ نەستاندبوو نەدکاری دامەزراندنا خوە تەمام بکە.

ل سەر ڤێ یەکێ ژی پارتیەک ب ناڤێ پارتیا ھێڤیا گەل ھات دامەزراندن و دەستویریا دامەزراندنا پارتیا ھێڤیا گەل ژ وەزارەتا کارێن ناڤخوەیی ھات وەرگرتن.

پشتی ڤێ یەکێ ژی پارتیا ھێڤیا گەل ب کۆنگرەیەکێ ناڤێ خوە گوھەرت و ناڤێ خوە کر پارتیا ئینسان و ئازادی و بریارا سیستەما ھەڤسەرۆکاتیێ ھات دایین. داوود گولەر و ئەحمەد کایا ژی ھەڤسەرۆکێن وێ نە.