ب سەدەما هەبوونا چەکدارێن پەکەکێ د 6 رۆژان دە ترکیێ هەری کێم ئێریش ل سەر 8 گوندێن دهۆکێ ئەنجامدانە

ب سه‌ده‌ما لڤ و ته‌ڤگه‌رێن چەکدارێن په‌كه‌كێ د ناڤا گوندێن سەر ب باژارێ دهۆکێ ڤە، بالافرێن شه‌ر یێن ده‌وله‌تا ترك ب ده‌هان بۆمبه‌ و مووشه‌ك ل سه‌ر هه‌ژماره‌كه‌ گوند و هه‌رێمێن دیار یێن پارێزگه‌ها دهۆكێ باراندن.

چاڤكانیێن داركا مازی ئاشكه‌ره‌ كر، ژ 4/9/2024 هه‌یا 9/9/2024 بالافرێن شه‌ر یێن تركیێ هه‌ژماره‌كا گوندێن دهۆكێ ل ده‌ڤه‌رێن به‌رواری بالا و نهێلێ بۆردومان كرنه‌ و زراره‌ك پر مه‌زن ب خوه‌زا و ئاقارێ وان هه‌رێما گهاندیە.

چاڤكانیێن داركا مازی ده‌ستنیشان كر، سه‌ده‌ما ئێریشێن به‌رده‌وام یێن ده‌وله‌تا ترك ل سه‌ر گوندێن دهۆكێ بۆ لڤ و ته‌ڤگه‌ر ب گۆمان یا چه‌كدارێن په‌كه‌كێ ڤه‌دگه‌ره‌ كو رێخستن دخوازه‌ ئه‌ڤ گوندە وه‌رن ڤالا كرن و ببن قادێن شه‌ر.

ئێریشێن ترکیەیێ ب ڤی ئاوا بوونە:

4/9/2024

دەمژمێر 3:35 نیڤرۆژێ، بالافرێن شەری یێن لەشکەرێ ترکیەیێ دەریێ گەلیێ سێڤێ ل هنداڤی گوندێ بەرچێ یێ سەر ب دەڤەرا نهێلێ بۆمبەباران کریە.

5/9/2024

دەمژمێر 1:20 شەڤێ لەشکەرێ ترکیەیێ ب چەکێ دۆشکە تەقە ل سەرێ سیلێ کو دکەڤە چیایێ کورەژارۆ ل هنداڤی ناحیەیا شێلادزێ کریە.

دەمژمێر 9:30 شەڤێ، بالافرێن شەری یێن لەشکەرێ ترکیەیێ تونەلا پەکەکێ یا دکەڤە چیایێ مەتینا ل هنداڤی گوندێ گوهەرزێ یێ سەر ب دەڤەرا نهێلێ ڤە بۆمبەباران کریە.

دەمژمێر 9:45 هەیانی 10:15 شەڤێ، هەلیکۆپتەرێن لەشکەرێ ترکیەیێ ب چەکێ دۆشکە و مووشەکان گەلیێ بێشیلێ و گەلیێ بازێ یێن سەر ب دەڤەرا بەرواری بالا ڤە هەدەف گرتنە.

دەمژمێر 6:30 ئێڤارێ بالافرێن شەری یێن ترکیەیێ تونەلا پەکەکێ یا کو دکەڤە هنداڤی گوندێ گوهەرزێ بۆمبەباران کریە، هەر وەها جارەکە دن د دەمژمێر 9:42 هەیانی 11:40 شەڤێ دە ئەڤ تونەل ژ ئالیێ هەلیکۆپتەرێن شەری یێن لەشکەرێ ترکیەیێ ب چەکێ دۆشکە هاتیە هەدەف گرتن.

دەمژمێر 9:25 هەیانی 9:50 شەڤێ، هەلیکۆپتەرێن شەری یێن ترکیەیێ ب چەکێ دۆشکە و ب مووشەکان گەلیێ بازێ یێ سەر ب دەڤەرا بەرواری بالا ڤە ب زێدەتری ژ 20 مووشەکان هەدەف گرتیە.

6/9/2024

دەمژمێر 2:35 نیڤرۆژێ، تۆپخانەیێن لەشکەرێ ترکیەیێ دەردۆرێن گوندێ گوهەرزێ یێ سەر ب دەڤەرا نهێلێ ڤە بۆمبەباران کریە.

دەمژمێر 9:30 شەڤێ، هەلیکۆپتەرێن شەری یێن ترکیەیێ ب چەکێ دۆشکە و ب مووشەکان شکەفتا بابەکرا ل گەلیێ بازێ یێ سەر ب دەڤەرا بەرواری بالا ڤە هەدەف گرتیە.

7/9/2024

دەمژمێر 3:15 نیڤرۆژێ، بالافرێن شەری یێن ترکیەیێ جارەکە دن تونەلا چەکدارێن پەکەکێ یا دکەڤە هنداڤی گوندێ گوهەرزێ هەدەف گرتیە، هەر وەها د دەمژمێر 11:52 شەڤێ جارەکە دن ئەڤ تونەل هاتیە هەدەفگرتن.

8/9/2024

دەمژمێر 1:5 نیڤرۆژێ، بالافرێن شەری یێن ترکیەیێ دناڤبەرا گەلیێ بازێ و گەلیێ بێشیلێ یێن سەر ب دەڤەرا بەرواری بالا ڤە بۆمبەباران کریە.

دەمژمێر 10:00 هەیانی 11:15 شەڤێ، دو هەلیکۆپتەرێن شەری یێن ترکیەیێ ب چەکێ دۆشکە و ب مووشەکان گەلیێ بازێ، گەلیێ بێشیلێ و دەرگەلا مووسابەگێ ب زێدەتری ژ 25 مووشەکان هەدەف گرتنە.

9/9/2024

دەمژمێر 2:10 شەڤێ، هەلیکۆپتەرێن شەری یێن ترکیەیێ دەڤەرا رووبارێ سپنە و گەلیێ دێرەشێ هەدف گرتنە، هەر وەها د دەمژمێر 8:33 سەرێ سبەهێ دە، بالافرێن لەشکەرێ ترکیەیێ گەلیێ دێرەشێ و پشتا گوندێ دێرەشێ هەدەف گرتنە.

دەمژمێر 8:30 هەیانی 9:20 شەڤێ هەلیکۆپتەرێن شەری یێن ترکیەیێ گەلیێ بازێ هەیانی دگەهە گەلیێ بێشیلێ یێن سەر ب ناحیا کانیماسێ ڤە ب چەکێ دۆشکە و مووشەکان هەدەف گرتیە.

ژ گولانا ئیسال 2024ێ ڤه‌ و پاش دژواربوونا ئێریشێن ده‌وله‌تا ترك، رێخستنا په‌كه‌كێ ب ئه‌نقه‌ست چه‌كدارێن خوه‌ دشینه‌ دۆربه‌را گوندێن پارێزگه‌ها دهۆكێ، ئه‌ڤ گوند ده‌وام دكه‌ڤن به‌ر ئێریشان و ڤێ نیگه‌رانیه‌ك مه‌زن ل جه‌م شێنییان چێكریه‌ و په‌كه‌كه‌ ڤێ یه‌كێ ب زانه‌بوون دكه‌ و دخوازه‌ ئه‌و گوند و هه‌رێمێن دهۆكێ وه‌رن ڤالا كرن.