ئامەریکا: مەرجێن هلبژارتنا ل رۆژئاڤایێ کوردستانێ نەیێن گونجایینە

وەزارەتا دەرڤەیا ئامەریکایێ ل سەر ھلبژارتنێن شارەداریان یێن رێڤەبەریا خوەسەرا رۆژئاڤایێ کوردستانێ داخویانیەک بەلاڤ کر.

“مەرجێن لدارخستنا ھلبژارتنان پێک نەھاتنە”

د داخویانیێ دە ئاماژە ب رەوشا سووریێ و رۆژئاڤایێ کوردستانێ ھات کرن:

“ئامەریکا دنرخینە کو شەرت و مەرجێن پێویست ژ بۆ لدارخستنا ھلبژارتنێن ئازاد، عادل، زەلال و بەرفرەھ ل باکور و رۆژھلاتێ سووریەیێ پێک نەھاتنە.

ئامەریکا ژ بەر ڤێ یەکێ پشتگریێ نادە داخویانیا داوی یا رێڤەبەریا خوەسەرا دەمۆکراتیک یا باکور و رۆژھلاتێ سووریەیێ.

ئامەریکا ب بەردەوامی راگھاندیە کو ھەر ھلبژارتنێن کو ل سووریەیێ چێببن، دڤێت ئازاد، دادپەروەر، زەلال و بەرفرەھ بن و ل گۆری بریارا 2254 یا کۆنسەیا ئەنجوومەنا ئەولەھیێ یا نەتەوەینێن یەکبوویی پێک وەرن.

شەرت و مەرجێن ھلبژارتنێن ب ڤی رەنگی نھا ل سووریێ و ل باکور و رۆژھلاتێ سووریەیێ پێک نەھاتنە.”

“ل سەر لدارخستنا ھلبژارتنان کار بکن”

5ێ ئیلۆنێ کۆمیسیۆنا بلندا ھلبژارتنانا رێڤەبەریا خوەسەر دەربارێ لدارخستنا ھلبژارتنێن شارەداریان داخویانیەک بەلاڤ کر.

رێڤەبەریا خوەسەر د داخویانیێ دە گۆتبوو:

“ژ بۆ کو ل گۆری پێویستیێ ئامادەکاریێن پێویست ژ بۆ ھلبژارتنێن شارەداریان بێن کرن، کۆمیسیۆنا بلندا ھلبژارتنان یا باکور و رۆژھلاتێ سووریەیێ ژ کۆمیسیۆنێن کانتۆنان رە دەستوورێ ددە کو ل گۆری رەوشا ھەر پارێزگەھەکێ د دەما کو ئەو گونجاو دبینن دە ل سەر لدارخستنا ھلبژارتنێن شارەداریان کار بکن.”

چ بووبوو؟

رێڤەبەریا خوەسەر یا رۆژئاڤایێ کوردستانێ بریار دابوو کو 11 خزیرانێ ھلبژارتنێن شارەداریان بێن کرن.

ترکیەیێ پشتی ڤێ بریارێ ئێرشێن خوەیێن ل رۆژئاڤایێ کوردستانێ زێدە کربوون و ژ بۆ ھلبژارتن نەیێن کرن گەف خواربوو.

ئامەریکایێ ژی ژ بەر نەبوونا شەرت و مەرجێن گونجاو ژ رێڤەبەریا خوەسەر خوەستبوو کو لدارخستنا ھلبژارتنان پاش بێخە.

ل گۆری زانیاریێن کۆمیسیۆنا بلندا ھلبژارتنان یا رێڤەبەریا خوەسەر، ھلبژارتن دێ ل 7 کانتۆن و ھەرێمێن رێڤەبەریا خوەسەرێن وەکی شەھبا-عەفرین، جزیر، منبج، فرات، تەبقا، رەقا، دێرەزۆرێ بێن لدارخستن.

د ھلبژارتنان دە دێ ژ بۆ 121 ناڤەندان ھەڤسەرۆکێن شارەداریان و ئەندامێن مەجلیسێن شارەداریان هێن ھلبژارتن.

ل رێڤەبەریا خوەسەر ھەتا نھا 2 جاران ھلبژارتن ھاتنە لدارخستن.

کۆمیسیۆنا بلندا ھلبژارتنان بریار دابوو کو 30 گولانێ ھلبژارتن بهێن لدارخستن لێ پاشێ ھلبژارتن هاتنە پاشخستن بۆ 11 خزیرانێ ھاتبوون کرن.

ل رێڤەبەریا خوەسەر یا رۆژئاڤایێ کوردستانێ مافێ 3 ملیۆن کەسان ھەیە بەشداری دەنگدانێ ببن.

ل ئالیێ دن، ئەو پەنابەرێن کو زێدەتری 5 سالان ل رێڤەبەریا خوەسەر نشتەجھ بوونە ژی دکارن بەشداری ھلبژارتنان ببن.

ھەر وھا ئەنەکەسێ بریار دابوو کو ھلبژارتنان بایکۆت بکە.