ئامارا ئێریشێن ترکیەیێ و پاشڤە ڤەکشینا چەکدارێن پەکەکێ د 4 رۆژێن دەرباسبوویی دە

ب سەدەما هەبوونا چەکدارێن پەکەکێ د 4 رۆژان دە ترکیێ هەری کێم ئێریش ل سەر 11 گوندێن دهۆکێ ئەنجامدانە

ب سه‌ده‌ما لڤ و ته‌ڤگه‌رێن چەکدارێن په‌كه‌كێ د ناڤا گوندێن سەر ب باژارێ دهۆکێ ڤە، بالافرێن شه‌ر یێن ده‌وله‌تا ترك ب ده‌هان بۆمبه‌ و مووشه‌ك ل سه‌ر هه‌ژماره‌كه‌ گوند و هه‌رێمێن دیار یێن پارێزگه‌ها دهۆكێ باراندن.

چاڤكانیێن داركا مازی ئاشكه‌ره‌ كر، ژ 18/9/2024 هه‌یا 21/9/2024 بالافرێن شه‌ر یێن تركیێ هه‌ژماره‌كا گوندێن دهۆكێ ل ده‌ڤه‌رێن به‌رواری بالا و نهێلێ بۆردومان كرنه‌ و زراره‌ك پر مه‌زن ب خوه‌زا و ئاقارێ وان هه‌رێما گهاندیە.

چاڤكانیێن داركا مازی ده‌ستنیشان كر، سه‌ده‌ما ئێریشێن به‌رده‌وام یێن ده‌وله‌تا ترك ل سه‌ر گوندێن دهۆكێ بۆ لڤ و ته‌ڤگه‌ر ب گۆمان یا چه‌كدارێن په‌كه‌كێ ڤه‌دگه‌ره‌ كو رێخستن دخوازه‌ ئه‌ڤ گوندە وه‌رن ڤالا كرن و ببن قادێن شه‌ر.

ئێریشێن ترکیەیێ ب ڤی ئاوا بوونە:

18/9/2024

ساعەت 8:50 شەڤێ، بالافرێن لەشکەرێ ترکیەیێ ئاقارێ گوندێ سێدەرا یێ سەر ب ناحیا چەمانکێ ل دەڤەرا گارە بۆمبەباران کر.

ساعەت 9:00 هەیانی 9:30 شەڤێ، بالافرێن لەشکەرێ ترکیەیێ سەرێ چیایێ خێرێ ل هنداڤی گولیێ قادێ و پشتا گوندێ سەرکاف یێ سەر ب ناحیا ئەترووش بۆمبەباران کر.

ساعەت 9:04 شەڤێ، لەشکەرێ ترکیەیێ پشتا گوندێ سەرگەلێ یێ سەرب دەڤەرا نهێلێ بۆمبەباران کر.

ساعەت 11:55 شەڤێ، هەلیکۆپتەرێن شەر یێن ترکیەیێ ب چەکێ دۆشکا تونەلا پەکەکێ یا دکەڤە هنداڤی گوندێ گوهەرزێ یێ سەر ب دەڤەرا نهێلێ هەدەف گرت.

19/9/2024

ساعەت 12:15 هەیانی 12:30 شەڤێ، هەلیکۆپتەرێن شەر یێن ترکیەیێ گەلیێ بازێ یێ سەر ب دەڤەرا بەرواری بالا ب چەکێ دۆشکا و مووشەکان هەدەف گرتیە.

ساعەت 4:30 ئێڤارێ، بالافرێن شەر یێن ترکیەیێ گەلیێ بێشیلێ یێ سەر ب دەڤەرا بەرواری بالا ڤە هەدەف گرتیە.

ساعەت 1:24 شەڤێ، هەلیکۆپتەرێن شەر یێن لەشکەرێ ترکیەیێ دەڤەرێن شارا، گیزێ، تونەلا پەکەکێ یا ل هنداڤی گوندێ گوهەرزێ، دەردۆرا گوندێ بەرچێ و سەرگەلێ یێن سەر ب دەڤەرا نهێلێ ڤە بۆمبەباران کرنە.

ساعەت 2:00 نیڤرۆژێ، جارەکە دن بالافرێن شەر یێن ترکیەیێ تونەلا پەکەکێ یا دکەڤە هنداڤی گوندێ گوهەرزێ بۆمبەباران کریە.

20/9/2024

ساعەت 2:13 نیڤرۆژێ، بالافرێن لەشکەرێ ترکیەیێ نێڤبەرا گوندێ شێلازا و گوندێ ئێکمالێ یێن سەر ب دەڤەرا بەرواری بالا ڤە بۆمبەباران کریە.

ساعەت 2:24 نیڤرۆژێ، بالافرێن شەر یێن ترکیەیێ هنداڤی گوندێ ئێکمالە یێ سەر ب دەڤەرا بەرێ گارێ بۆمبەباران کریە.

21/9/2024

ساعەت 4:30 ئێڤارێ، بالافرێن شەر یێن ترکیەیێ هنداڤی گەلیێ بازێ یێ سەر ب دەڤەرا بەرواری بالا ڤە بۆمبەباران کریە.

ژ گولانا ئیسال 2024ێ ڤه‌ و پاش دژواربوونا ئێریشێن ده‌وله‌تا ترك، رێخستنا په‌كه‌كێ ب ئه‌نقه‌ست چه‌كدارێن خوه‌ دشینه‌ دۆربه‌را گوندێن پارێزگه‌ها دهۆكێ، ئه‌ڤ گوند ده‌وام دكه‌ڤن به‌ر ئێریشان و ڤێ نیگه‌رانیه‌ك مه‌زن ل جه‌م شێنییان چێكریه‌ و په‌كه‌كه‌ ڤێ یه‌كێ ب زانه‌بوون دكه‌ و دخوازه‌ ئه‌و گوند و هه‌رێمێن دهۆكێ وه‌رن ڤالا كرن.