په‌كه‌كێ ده‌ربارێ هاتنا ماهر ئه‌سه‌د بۆ قه‌ندیلێ داخویانی دا

په‌كه‌كێ ئیدایێن کو دبێژن ماهر ئەسەدێ برایێ سەرۆکێ بەرێ یێ سووریێ بەشار ئەسەد و سەرۆکێ لیوایا چارەمین یا ئارتێشا وی وەلاتی ل چیایێ قەندیلێ کو د بن کۆنترۆلا وێ دە یە، رەد کر.

بەردەڤکێ په‌كه‌كێ زاگرۆس هیوا د هەڤپەیڤینەکە تایبەت دە ل گەل رۆژنامەیا ئەل-عەرەبی ئەل-جەدید، ئەڤ ئیدیعا رەد کر و ئەو ب «بێبنگەهـ و سیاسی» ب ناڤ کر.

هیوا گۆت، “ئەز نووچەیێن دەربارێ هەبوونا دەستهلاتدارێن بەرێ یێن حکوومەتا سووریێ ل قه‌ندیلێ رەد دکم”.

كه‌نالا ئه‌ل حه‌ده‌س یەکەم جار به‌لاڤكربوو كو ماهر ئەسەد و سەرۆکێ بەرێ یێ بورۆیا ئەولەکاریا نشتمانی یا سووریێ عەلی مەملووک ل قەندیلێ ب ئەفسەرێن پاسدارێن ئیرانێ و ئەندامێن حزبوللاهێ رە هەڤدیتن کرنە.

پشتره‌ حکوومەتا ئیراقێ و یه‌نه‌كێ ژی ئەڤ ئیدیعا رەد کرن. بەردەڤکێ وەزارەتا ناڤخوە یا ئیراقێ مقداد میری ژی گۆتبوو کو ئەڤ تۆهمەت ب تەڤاهی بێبنگەهن.

چاڤكانی: The New Arab