ئۆجالانی د 4 خالان دا داخواز ژ كۆنگره‌یا په‌كه‌كێ كربوو ده‌ست ژ هه‌ر تشتی ژ بۆی تركیه‌یێ به‌ردن

مەدیایا فه‌رمی یا په‌كه‌كێ ئیرۆ 4 خالێن كو عه‌بدوللا ئۆجالان پێشكێشی كۆنگره‌یا 12مین یا رێخستنێ كربوون ئاشكه‌ره‌ كرن، ناڤه‌رۆكا هه‌ر 4 خالان د به‌رژه‌وه‌ندییا ده‌وله‌تا تركیه‌یێ ده‌ یه‌ و دیێك ژ وان خالان ده‌ گۆتیه‌: «به‌ردێلا 52 سالێن تێكۆشینا په‌كه‌كێ جڤاكا ده‌مۆكراتیكه!!»‌.

پارتیا کارکەرێن کوردستانێ، ل سه‌ر ده‌ستپێشخه‌رییا ده‌وله‌ت باخچه‌لی و بانگا 27ێ سباتێ یا رێبەرێ خوە عه‌بدوللا ئۆجالان، كۆنگره‌یا خوه‌ یا 12مین د ناڤبەرا 5 و 7ێ گولانێ دە پێک ئانی و بریارا خوه‌هلوه‌شاندنێ و ب داوی كرنا خه‌باتا چه‌كداری دا.

ئۆجالان 4 خالێن سه‌ره‌كه‌ پێشكێشی كۆنگره‌یێ كربوون، ئیرۆ رۆژا چارشه‌می 4 هه‌زیرانا 2025ێ په‌كه‌كێ ئه‌و خالێن ئۆجالان به‌لاڤ كرن و ب ڤی ره‌نگی:

ئۆجالان د وان خالان ده‌ گۆتیە په‌كه‌كێ ژ بەر کو تەمەنێ خوە تژی کریە، دڤێ ب فەرمی وه‌ره‌ هلوه‌شاندن.

نرخاندنا ئۆجالان ب ڤی رەنگییە:

هەڤرێیێن هێژا!

د داویا 52 سالێن دیرۆکا مە یا تێکۆشینێ دا ئەم ب رەنگەکی فەرمی سەردەمەکێ دیرۆکی ل پشت خوە دهێلین. ب واتەیەکا هێژان ئاشكه‌را تر ئەم دخوازین ژ سۆسیالیزما ب ئارمانجا نەتەوە دەولەتێ دەرباسی سەردەمەکێ دیرۆکی یێ سۆسیالیزما جڤاکا دەمۆکراتیک ببین. وەکی دی کو هه‌ر تشته‌كی داوی و دەستپێکا خوه‌ هەیە.

سه‌رده‌مێ به‌رێ، ژ بەر چار ئه‌گه‌رێن بنگه‌هین دڤێت بهێته‌ ده‌رباز كرن.

1- ژ بەر کو په‌كه‌كێ ژ ئالیێ جەوهەری ڤە تەمەنێ خوە ته‌مام کریە، دڤێت ب فەرمی فەسخ ببیت. مەبەست ژ ڤێ یەکێ بەلاڤبوونا سۆسیالیزما راستینه‌ و ژ بەر ئه‌گه‌رێن ناڤخوەیی كو پێویستی ب ڤەکرنا رێیەکا نوو یا سۆسیالیزمێ، رەوشا ناسکرن و پێکهاتنا ناسنامەیا کورد ە.

2- تێکۆشینا چەکداری یا كو ب ستراتەژی ب ئارمانجا نەتەوە-دەولەتێ ڤه‌ گرێدای بوو. دڤێت ژ ڤێ ئارمانجێ ده‌رباسی ناڤا بەرنامەیا جڤاکا دەمۆکراتیک ببیت و ب رێكێن یاسایی و سیاسه‌تا  دەمۆکراتیک. لەوما پێویستی پێ هەیە کو دەست ژ تێکۆشینا چەکداری بهێته‌ بەردان. قه‌ره‌بوو و بەرسڤا ڤێ ژی ناسکرنا مافێ سیاسەتا دەمۆکراتیک و مسۆگەرییا مافێن یه‌كگرتی یێن بهێزن.

3- ژ بەر کو هەڤدیتن و دیالۆگا ل گه‌ل دەولەتێ د بن فەرمیەتا په‌كه‌كێ دا ناهێته‌ قەبوولکرن، پێویستی ب فەسخکرنێ هەیە کو وەک هێمانەکا گرنگ بوویە رۆژەڤ. ئەڤ یەک وەکی ئەنجامەکێ رایا گشتی د شیان دایه‌ بهێته‌ دیتن.

4- ژ بۆ سەردەمەکێ نوو، دەرباسبوونا ناڤ قۆناغا ئاشتی و جڤاکا دەمۆکراتیک پێویستییە. هەم ژ ئالیێ ناڤەرۆکێ ڤە و هەم ژی ژ ئالیێ فۆرمێ ڤە وەک ئالتەرناتیفا سەردەمێ دەستپێکێ، ئەز د وێ باوەریێ دا مە کو بریارێن کۆنگرێ یێن خوه‌هلوه‌شاندنێ، جڤاکا دەمۆکراتیک و سیاسەت و ماف دێ دیرۆکی بن و سەرکەفتنێ بۆ دخوازم.

ئیسرارا ل سەر مرۆڤاتیێ ئیسرارا ل سەر سۆسیالیزمێ یە.

سۆسیالیزما نەتەوە-دەولەت تێکچوونە، سۆسیالیزما جڤاکا دەمۆکراتیک سەرکەتنە.