مه‌سروور بارزانی: بۆ چاره‌سه‌ركرنا مووچه‌ی شانده‌كێ به‌غدا ل دو رۆژێن بهێت دێ هێته‌ هه‌ولێرێ

سەرۆکوەزیرێ هەرێما کوردستانێ مەسروور بارزانی راگهاند، نەدانا مووچەیێن فەرمانبەران ژ ئالیێ بەغدایێ ڤە “کارەکی نەدەستوورییە”. دا زانین ژی، ژ بۆ چارەسەرییه‌كا راسته‌قینه‌ یا ڤێ قەیرانێ، دێ د ناڤا دو رۆژێن بهێت دە شاندەکە حکوومەتا فەدەرال سەردانا هەرێما کوردستانێ بکە.

سەرۆکوەزیرێ هەرێما کوردستانێ مەسروور بارزانی، ئیرۆ چارشەمێ 25.06.2025، پشتی جڤینا ئەنجوومەنا وەزیران، د کۆنفەرانسەکە رۆژنامەڤانی دە ل سەر گەشەدانێن هەری داوییێن گرێدایی مووچە، پەیوەندیێن هەولێر-به‌غدا و رەوشا هەرێمێ ئاخڤی.

مزگینی ژ بۆ کارمەندان: شاندەک تێ هەولێرێ

سەرۆکوەزیر بارزانی تەکەز کر، نەدانا مووچەیێن دو مەهێن بۆرییێن کارمەندێن هەرێما کوردستانێ ب ئاوایەکی نەیاسایی پێک هاتیە و گۆت: “ئەڤ یەک کارەکی نەدەستوورییە و نابە کو مووچەیێ فەرمانبەران ببە بەشەک ژ کێشەیێن سیاسی.”

دەستنیشان کر ژی، ئەوێ ب ت ئاوایی دەڤ ژ مافێن دەستووری یێن خەلکێ هەرێما کوردستانێ بەرنەدن و گۆت: “رۆژەک دەرباس نەبوو کو ئەم ژ بۆ چارەسەرکرنا ڤێ قەیرانێ د ناڤا هەولدانان دە نەبوون. دوهـ من ب سەرۆکێ ئەنجوومەنا دادوەری و سەرۆکوەزیرێ ئیراقێ رە ژی ئاخڤی. وان ژی ب کێفخوەشی راگهاند کو ئامادەنە د ناڤا دو رۆژان دە شاندەکێ ژ بۆ چارەسەرکرنا پرسا مووچەیان بشینن هەرێمێ.”

چاڤ ل ئەنجوومەنا دادوەریێ یە

مەسروور بارزانی رەخنە ل دادگەها بلندا فەدەرالی یا ئیراقێ گرت و گۆت: “ئەم ل بەندێ بوون کو دادگەها بلندا فەدەرالی بریارەکێ د بەرژەوەندیا مووچەخواران دە بدە، لێ مخابن نها دادگەهـ هاتیە هلوەشاندن. نها چاڤێ مە ل ئەنجوومەنا بلندا دادوەریێ یا ئراقێ یە کو پرسگرێکا مووچەیان چارەسەر بکە.”

زیانێن راوەستاندنا هناردەکرنا پەترۆلێ

دەربارێ راوەستاندنا هناردەکرنا پەترۆلا کوردستانێ دە، مەسروور بارزانی ئەشکەرە کر، ژ بەر ڤێ یەکێ زێدەتری 25 ملیار دۆلار زیان گهیشتیە ئابۆریا ئیراق و هەرێما کوردستانێ و گۆت: “هەتا نها حکوومەتا فەدەرالا ئیراقێ ئەڤ زیان ژ بۆ خەلکێ هەرێما کوردستانێ قەرەبوو نەکریە.”

سەرۆکوەزیر مەسروور بارزانی ئاماژە ب وێ یەکێ ژی کر، ژ بۆ ژنووڤە دەستپێکرنا هناردەکرنێ، دڤێ ب هەموو ئالیان رە، ب تایبەتی ب کۆمپانیان رە، لهەڤکرن بێ کرن.

پەیمانێن ل ئامەریکایێ یاسایی نە

ل سەر پەیمانێن کو ڤێ داویێ ل ئامەریکایێ هاتنە ئیمزەکرن، سەرۆکوەزیر بارزانی گۆت، ئەڤ یەک مافەکی دەستووری و یاسایییێ هەرێما کوردستانێ یە. دیار کر ژی، هەر دو کۆمپانیێن کو پەیمان ب وان رە هاتنە ئیمزەکرن، زێدەتری 15 سالن ل هەرێما کوردستانێ کار دکن، لەوما پەیمان ژ هەر ئالی ڤە یاسایی یە.

ئاگربەستا ل هەرێمێ و رۆلا ئیراقێ

مەسروور بارزانی بەهسا رەوشا گشتی یا هەرێمێ ژی کر و راگهاند کو “ئاگربەستەکە د ناڤبەرا ئیسرائیل و ئیرانێ دە د بەرژەوەندیا تەڤاهیا هەرێمێ دەیە و ئەم هێڤیدارن ببە سەدەما ڤەگەرا ئاشتی و ئارامیێ.”

د داویێ دە، بارزانی سپاسیا سەرۆکوەزیرێ ئیراقێ محەمەد شه‌یاع سوودانی کر ژ بەر هەولدانێن وی یێن ژ بۆ کو ئیراق تەڤلی شەر و ئالۆزیێن هەرێمێ نەبە.