هەسەدە و ئارتێشا سووریەیێ ھەڤدو ب تۆپبارانا ل سەر ھەڤ تاوانبار دکن

تەڤی کو د دەمێن داوی دە گۆتووبێژێن ژ بۆ تەڤلیبوونا ھەسەدێ د ناڤا ئارتێشا سووریەیێ دە رۆژەڤەکا گەرمە، ل سەر خەتێن تەماسێ یێن د ناڤبەرا ھەسەدێ و ئارتێشا سووریەیێ دە ئالۆزی زێدە دبە. ھەر دو ئالی ھەڤدو ب دەستپێکرنا ئێریشێن تۆپبارانێ تاوانبار دکن.

وەزارەتا بەرەڤانیێ یا سووریەیێ: ھەسەدێ ئێریش کر

رێڤەبەریا راگھاندن و تێکلیانا وەزارەتا بەرەڤانیێ”یا سووریەیێ ژ ئاژانسا فەرمی یا سانا رە راگھاند، ھەسەدێ گوندێ کیاریێ و دەردۆرا وێ ل گوندەوارێ منبجێ تۆپباران کرنە.

د داخویانیێ دە ھات گۆتن: “یەکینەیێن مەیێن ئارتێشا سووریەیێ د ڤان کێلیان دە ب دەربێن ھوور و کوور بەرسڤا چاڤکانیێن ئاگر ددن. ھێزێن مە کارین ل دەردۆرا باژارێ مەسکەنەیێ یێ ل رۆژھلاتێ حەلەبێ، جھێ یەک ئاڤێژۆکا رۆکەتان و تۆپەکا مەیدانی کو د ئێریشێ دە ھاتنە بکارئانین، دەستنیشان بکن.”

ھەسەدە: کۆمێن بێ دیسیپلین یێن ئارتێشێ دەستپێکەرن

ل ھەمبەری ڤان ئیدیعایان، ناڤەندا راگھاندنێ یا ھێزێن سووریەیا دەمۆکراتیک (ھەسەدێ) داخویانیەک بەلاڤ کر و ھەموو تاوانباریێن حکوومەتا شامێ رەد کرن. ھەسەدێ راگھاند، راستی بەرەڤاژی ڤێ یەکێیە و “کۆمێن بێ دیسیپلین” یێن د ناڤا ھێزێن حکوومەتێ دە، ئێریشان پێک تینن.

د داخویانیا ھەسەدێ دە ھات گۆتن: “شەڤا شەمبیێ، ڤان کۆمان بێی هیچ بەهانەیەک، زێدەتری 10 تۆپ ئاڤێتن ھەرێمێن سڤیلان یێن ل دەڤەرا دێرا ھافرێ. ھێزێن مە ژی د چارچۆڤەیا مافێ خوەپاراستنا رەوا دە بەرسڤ دان چاڤکانیێن ئێریشان.”

ھەسەدێ ھەروھا وەزارەتا بەرەڤانیێ یا سووریەیێ ب “بەرەڤاژیکرنا راستیان و خاپاندنا رایا گشتی” تاوانبار کر و دەستنیشان کر کو ئەڤ یەک خزمەتا ئاشتی و ئارامیێ ناکە.

ھەسەدێ بانگ ل سازیێن پێوەندیدار یێن حکوومەتا سووریەیێ کر کو “بەرپرسیاریا خوە ب جھ بینن و کۆمێن بێ دیسیپلین یێن د بن کۆنترۆلا خوە دە کۆنترۆل بکن.”

ئەڤ ئالۆزی د دەمەکێ دە روو ددن، فەرماندارێ گشتی یێ ھەسەدێ مەزلووم عەبدی د ھەڤپەیڤینەکێ دە لگەل رۆژنامەیا ھندستانێ “ئیندان ئیکسپرێسس” تەکەز کربوو، ئەو پابەندی پەیمانا لھەڤکرنێ نە کو د 10ی ئادارێ دە لگەل حکوومەتا دەمکی یا سووریەیێ ھاتیە ئیمزەکرن.

ل گۆری وێ پەیمانێ، تێ پایین کو سازیێن سڤیل و لەشکەری یێن رێڤەبەریا خوەسەر تەڤلی سازیێن دەولەتا سووریەیێ ببن. مەزلووم عەبدی گۆتبوو، “مە یەکبوونا ھەسەدێ و ئارتێشا سووریەیێ د ڤێ پەیمانێ دە قەبوول کر” و دەستنیشان کربوو کو دڤێت ل سەر ھوورگولیان کار بهێت کرن دا کو ئارتێشەکا نشتمانی یا راستین بهێت ئاڤاکرن.