ئیلھام ئەحمەد: ئەز ژ وەلاتیان دخوازم ھشیار بن و ل دویڤ گۆتگۆتکان نەچن
بەرپرسا پەیوەندیێن دەرڤە یا رێڤەبەریا خوەسەر یا دەمۆکراتیکا ھەرێما باکور و رۆژھلاتێ سووریەیێ راگھاند: ئەز ژ وەلاتیان دخوازم کو پر ھشیار بن و ل دویڤ گۆتگۆتکان نەچن.
بەرپرسا پەیوەندیێن دەرڤەیا رێڤەبەریا خوەسەریا دەمۆکراتیکا ھەرێما باکور و رۆژھلاتێ سووریەیێ ئیلھام ئەحمەد ئیرۆ رۆژا دوشەمبێ، 19/1/2026ێ، ل سەر حەسابا خوە یا تۆرا جڤاکی یا Xێ نڤیسیە: ھەمی ئەو راپۆرتێن کو بەحسا کۆمکوژیێ ل حەسەکەیێ دکن نە راستن و ب تەڤاھی چێکری نە.
ئیلھام ئەحمەد ئاماژە ژی دا: ئەڤ تێکدان ژ ھێلا کۆمێن توندرەو یێن ھێزێن ئارتێشا عەرەبی یا سووریەیێ ڤە تێن بەلاڤکرن، ب مەرەما تێکدانا ئاگربەستێ، پەیداکرنا ئالۆزیێن عەشیری و چێکرنا دەرفەتان ژ بۆ ئێریشکرنا ل سەر حەسەکێ و کۆبانیێ.
بەرپرسا ناڤبری ل داویێ تەکەز ژی کر کو، ئەو پابەندی ئاگربەستێ نە و ژ بۆ یەکگرتنا تەڤاھییا ھێزان ل حەسەکەیێ دخەبتن.
وەزارەتا بەرەڤانیێ یا سووریەیێ دوھی رۆژا یەکشەمبی، 18/1/2026ێ، وەکی بجھانینا لھەڤکرنا نوو یا د ناڤبەرا شام و ھەسەدێ دە ب رەنگەکێ فەرمی راوەستاندنا شەر و ئاگربەستێ ل ھەمی ئەنیان راگھاند، ھەروەسا رێکار دان ھێزێن ئارتێشێ کو سەر و مالێن وەلاتیان بپارێزن.
وەزارەتا ناڤبری ھەروەسا راگھاند: ل سەر بنگەھا وێ پەیمانا کو د ناڤبەرا ئەحمەد شەرع و مەزلووم عەبدی دە ھاتیە کرن، ئەم رادگھینن کو ئاگربەست ل ھەمی ئەنیان و راوەستاندنا گشتی یا کریارێن لەشکەری ل دەڤەرێن جودا جودایێن پەڤچوونێ ھاتیە دەستپێکرن.”
ھەر وێ وەزارەتێ ئاماژە ژی دا کو، ئارمانجا ڤێ پێنگاڤێ “ئامادەکرنا ڤەکرنا کۆریدۆرەکا ئاشتیانە ژ بۆ ڤەگەرا شێنیان ژ بۆ دەڤەرێن وانە، و ھەروەسا رێ ل بەر ڤەگەرا دەزگەھێن دەولەتێ ڤەدکە دا کو ئەرکێن خوە د خزمەتا وەلاتیان دە بجیھ بینن.
