ھەسەدە: ل رەقایێ کۆمێن چەکدار ئێریشی گرتیگەھا ئەقتانێ کر

ھێزێن سووریەیا دەمۆکراتیک (ھەسەد)ێ راگھاند کو، کۆمێن چەکدار ل باژارێ رەقایێ ئێریشی گرتیگەھا ئەقتانێ کریە.

ھێزێن سووریەیا دەمۆکراتیک (ھەسەد)ێ ئیرۆ رۆژا دوشەم، 19/1/2026ێ راگھاند کو، کۆمێن چەکدارێن گرێدایی حکوومەتا سووریەیێ ئێریشی گرتیگەھا ئەقتانێ ل باژارێ رەقایێ کریە.

ھەسەدێ ئاماژە ژی دا: کۆمێن چەکدار د وێ ئێریشێ دە درۆن و چەکێن گران ب کار ئانینە، لێ ھێزێن وان بەرھنگاری وان بوونە و کارینە کو وێ ئێریشێ بشکینن و رێیێ ل وان چەکداران بگرن.

ئەڤ زێدەتر ژ ھەفتەیەکێ یە کو، ئارتێشا عەرەبی یا سووریەیێ ب فەرمانا سەرۆکێ سووریەیێ یێ دەمکی ئەحمەد شەرع ئێریشەکا لەشکەری ل دژی ھەر دو تاخێن کوردان؛ “ئەشرەفیە و شێخ مەقسوود” ل حەلەبێ و چەند دەڤەرێن دن یێن کوردان دایە دەستپێکرن. ئارتێشا عەرەبی یا سووریەیێ ھەروەسا رەقا، رۆژئاڤایێ فراتێ و بەنداڤا تشرینێ ژی کۆنترۆل کرنە.

ئارتێشا عەرەبی یا سووریەیێ ب رەنگەکێ تەڤلیھەڤ و ب چەکێن گران و تانکان شێنیان و خەلکێ سڤیل دکن ئارمانج، وەسا ژی نێزیکی 190 ھەزار وەلاتیان ئاوارە بوونە. ژ بەر بۆمبەبارانێن بەردەوامێن ئارتێشا ئەحمەد شەرع، زێدەتر ژ 25 سڤیلان ھاتنە کوشتن و زێدەتر ژ 100 کەسێن دن ژی بریندار بوونە.