وەزارەتا بەرەڤانیێ یا سووریەیێ: ئەم ب چ رەنگان ناچن ناڤ دەڤەرێن خوەجھبوونێ یێن کوردی
وەزارەتا بەرەڤانیێ یا حکوومەتا سووریەیێ د راگھاندنا خوەیا ھەری نوو دە پەیامەک ئاراستەیی کوردێن باکور-رۆژھلاتێ سووریەیێ کریە و ب رەنگەکێ فەرمی راگھاندیە کو، ھێزێن وانێن لەشکەری ب چ رەنگان ناچن ناڤ دەڤەرێن خوەجھبوونێ یێن کوردی.
وەزارەتا ناڤبری د وێ راگھاندنێ دە تەکەز ژی کر: ئەم پابەندبوونا خوەیا تەمام ب پاراستنا گەلێ کورد و ئەولەھیا وان تەکەز دکن، و ئەم جارەکا دن سۆزێ ددن کو ھێزێن مە نەچن ناڤ گوند و باژارکێن کوردان.
وەزارەتا بەرەڤانیێ یا حکوومەتا سووریەیێ ئاماژە ژی دا کو، ئارمانجا ئارتێشا سووریەیێ ڤەگەراندنا تەناھیێیە.
شامێ د بەشەکا دنا وێ راگھاندنێ دە ئامادەبوونا خوەیا تەمام ژ بۆ وەرگرتنا بەرپرسیاریا کامپا ھۆلێ و ھەمی زندانیێن داعشێ ل دەڤەرێ نیشان دایە و راگھاندیە کو، سەرپشکا کارێن وان شەرێ ل دژی تەرۆرێیە.
وەزارەتا بەرەڤانیێ یا سووریەیێ داخواز ژی کریە کو، پابەندی پەیمانا 18ێ چلەیێ بن و ب جھ بینن.
ئەڤ ژی د دەمەکێ دەیە کو، برێڤەبرێ رەوانگەھا سووریەیێ یا مافێن مرۆڤان رامی عەبدولرەحمان ھشیاریەکا توند ل سەر رەوشا رۆژئاڤایێ کوردستانێ دا و راگھاند: ئێریشێن نھا نە تەنێ ل دژی ھێزێن سووریەیا دەمۆکراتیک (ھەسەدێ) نە، بەلکی مەرەم ژێ قرکرنا ئەتنیکی یا گەلێ کوردە.
ئەڤ ھایداریێن رەوانگەھا سووریەیێ یا مافێن مرۆڤان د دەمەکێ دە نە کو، ئالۆزیێن لەشکەری ل باکور و رۆژھلاتێ سووریەیێ گھیشتنە ئاستا ھەری بلند و خەتەرەکا جدی ل سەر چارەنڤیسا ب میلیۆنان وەلاتیێن کورد ل دەڤەرێن جودا جودایێن رۆژئاڤایێ کوردستانێ چێ بوویە، کو رووبروویی ئێریشێن چەکداری یێن جودا جودا و ملیسێن بیانی بوونە.
