ئیتالیا: رۆلا سەرۆک بارزانی د پاراستنا کوردێن سووریەیێ دە هەژی رێزگرتنێ یە

سەرۆک مەسعوود بارزانی دوهـ (چارشەم، 21.01.2026) ل باژارێ رۆمایێ، د چارچۆڤەیا سەردانا خوە یا فەرمی ژ بۆ ئیتالیایێ دە، ب جیگرێ سەرۆکوەزیر و وەزیرێ دەرڤەیێ ئیتالیایێ ئانتۆنیۆ تاژان رە جڤیا.

مژارا سەرەکە یا وێ جڤینێ ژ بۆ نیقاشکرنا رەوشا سیاسی و ئەولەهیێ یا دەڤەرێ، ب تایبەتی ژی پێشهاتێن داویێ یێن سووریەیێ هاتبوو تەرخانکرن. هەردو ئالی ب بەرفرەهی ل سەر خەتەریێن سەرهلدانا تەرۆریستێن داعشێ د ڤێ رەوشێ دە ئاخڤین و تەکەز کر کو، دڤێ پرسگرێک و ئالۆزی ب رێیا دیالۆگ و هەڤفێمکرنا ئاشتیانە، دووری زمانێ زڤر و توندووتووژیا لەشکەری، بێن چارەسەرکرن.

ئانتۆنیۆ تاژان د پارەکا دن یا وێ جڤینێ ل سەر ناڤێ حکوومەتا وەلاتێ خوە پەسنا رۆلا ژیرانە و ب باندۆرا سەرۆک بارزانی د چەسپاندنا چاندا پێکڤەژیانێ و پاراستنا تەناهیێ ل ئیراق و هەرێما کوردستانێ دا.

ناڤبری رێزەکا تایبەتی ل بزاڤێن بەردەوامێن سەرۆک بارزانی ژ بۆ بدەستخستنا ئاشتیێ ل سووریەیێ گرت، ب تایبەتی ژی بزاڤێن وی ژ بۆ پاراستنا گەلێ کورد ل وی وەلاتی ژ هەر ئحتیمالەکا نەخوەستی و دوورخستنا وان ژ نەخوەشی و وێرانکارییان.

تێکلیێن دوئالی یێن د ناڤبەرا هەولێر و رۆمایێ دە مژارەکا دن یا نیقاشان بوو؛ هەر دو ئالی ل سەر گرینگیا بەردەوامکرنا تێکلیان و پێشخستنا وان د هەمی وارێن جودا جودا دە هەڤنەرین بوون.

ل داویێ ژی، وەزیرێ دەرڤەیێ ئیتالیایێ پابەندبوون و پشتگرییا وەلاتێ خوە ژ بۆ حکوومەتا هەرێما کوردستانێ و گەلێ کورد تەکەز کر.