نەتەوەیێن یەکگرتی: مە بۆ گھاندنا ئالیاریان بۆ کۆبانیێ داخوازا ھێسانکاریان کریە

نەتەوەیێن یەکگرتی ژ بەر رەوشا کۆبانیێ نیگەرانە و دبێژە کو، دۆرپێچکرنێ ژیانا وەلاتیان خستیە خەتەرێ.

جیگرێ سەکرەتەرێ گشتی یێ نەتەوەیێن یەکگرتی فەرحان حەق نیگەرانیا خوە ل سەر رەوشا مرۆڤی یا باژارێ کۆبانیێ یێ رۆژئاڤایێ کوردستانێ راگھاند و گۆت: ئەم نیگەرانین کو ھەمی رێیێن بەر ب کۆبانیێ ڤە ھاتنە گرتن و رەوشا مرۆڤی ھەر کو دچە خرابتر دبە.

فەرحان حەق ھەروەسا ئاماژە ژی دا: ئەلەکتریک تونەیە، ئاڤ خرابە و خەلک نکارە خزمەتێن بنگەھین ب دەست بخە. ناڤەندێن تەندورستیێ بەردەوامن، لێ دەرمان و پێدڤیتیێن پزیشکی گەلەک کێم بوونە.

نەتەوەیێن یەکگرتی لگەل رایەدارێن حەلەبێ د دانوستاندنان دە نە دا کو رێیەکێ ببینن کو ئالیکاریان ب لەز بگھینن کۆبانیێ. فەرحان حەق ھەروەسا گۆت: مە ئالیکاری گھاندیە حەسەکێ، رەقا و دێرازۆرێ و مە داخوازا ھێسانکاریان ژ بۆ گھاندنا ئالیکاریان کریە.

ھەروەسا تیما ھەیڤا سۆر یا کورد ل باژارێ کۆبانیێ ژی ھایداری ل سەر روودانا کارەساتەکا مرۆڤی یا مەزن ل وی باژاری دا. ھەروەسا د پەیامەکا لەزگین دە ژی ژ بۆ رێخستنێن ناڤنەتەوەیی و کۆمیسیۆنا بلندا پەنابەران یا گرێدایی نەتەوەیێن یەکگرتی، وێ داخوازا ئالیکاریێن بلەزێن مرۆڤی ژ بۆ رەوشا مرۆڤی یا وی باژاری ژی کر.

ل گۆری راگھاندنەکا وێ تیمێ، ئەڤ چەند رۆژن کو باژارێ کۆبانیێ و گوندێن دەردۆرا وێ رووبروویی کامپانیایەکا لەشکەری یا ھۆڤانە و دۆرپێچەکا گران بوونە. تەڤی راگھاندنا ئاگربەستێ ژی، ئەو دۆرپێچ بەردەوامە و ناھێلە پێدڤیێن بنگەھین یێن ژیانێ بگھیژن ناڤ وی باژاری.

رەوشا کۆبانیێ پشتی چەند رۆژان ژ دۆرپێچ و پەڤچوونان گھیشتیە ئاستەکا خەتەر. ل گۆری زانیاران، نێزیکی 150 ھەزار سڤیلان ل ناڤ وی باژاری ئاسێ بوونە و د رەوشەکا خراب دە نە. برینا ئاڤ، ئەلەکتریک، سۆتەمەنی، خوارن و خەتێن ئینتەرنەتێ ژیانا رۆژانەیا وەلاتیان ئاستەنگ کریە و بوویە سەدەما ئاوارەبوونا ھەژمارەکا مەزنا مالباتان ژ بۆ ناڤەندا وی باژاری.

گەلەک ژ ئاوارەیان ژ بەر سەرمایێ نەچارن کو ل دەرڤە یان ژی د ناڤ تمبێلێن خوە دە بمینن. ھەیڤا سۆرا کورد راگھاندیە کو، ھەژمارەکا زارۆکان ژ بەر سەرمایێ مرینە.