ل کۆبانێ کارەساتا مرۆڤی: 6 زارۆکان جانێ خوە ژ دەست دا
ژ بەر توندبوونا دۆرپێچا ل سەر باژارێ کۆبانیێ یێ رۆژئاڤایێ کوردستانێ، خوارن، دەرمان و سۆتەمەنی بەر ب خەلاسبوونێ ڤە دچن.
هەڤسەرۆکا هەیڤا سۆر یا کورد دا زانین کو ژ بەر نەبوونا ئۆکسیژین و سەرمایێ 6 زارۆکان جانێ خوە ژ دەست دایە و “ئار ب دەست ناکەڤە.”
هەڤسەرۆکا هەیڤا سۆرا کورد یا ل رۆژئاڤایێ کوردستانێ هەدیە عەبدولایێ، ژ رووداوێ رە گۆت، “دۆرپێچا توند یا ل سەر کۆبانیێ ئیرۆ دبە 5 رۆژ و باژار نێزیکی کارەساتەکە مرۆڤی بوویە.”
رەوشا خزمەتگوزاریێ ل باژێر د ئاستەکە مەترسیدار دەیە، نێزیکی 10 رۆژانە کو کارەبا و ئینتەرنەت ل کۆبانیێ قوت بوونە.
«زارۆکەکی نووبوویی ژ بەر نەبوونا ئۆکسژینێ مر»
هەڤسەرۆکا هەیڤا سۆرا کورد گۆت، “د ڤان 5 رۆژان دە 5 زارۆکێن بچووک ژ بەر نەبوونا دەرمان و سۆتەمەنیێ و ژ بەر سەرمایێ جانێ خوە ژ دەست دایە.
دۆهـ ئێڤاری ژی زارۆکەکی نووبوویی ژ بەر نەبوونا ئۆکسیژینێ ل نەخوەشخانەیا کۆبانیێ جانێ خوە ژ دەست دا.”
ژ بەر ئێرشێن ئارتێشا عەرەبان یا سووریەیێ، خەلکەکی زێدە ژ گوندێن دەردۆرا کۆبانیێ کۆچبەری ناڤەندا باژێر بوونە و پێدڤیا وان یا لەزگین ب جل و بەرگ، بەتانی و سۆتەمەنیێ هەیە.
«نان و ئاڤ نەمانە»
هەدیە ئەبدولایێ گۆت، “رەوشا کۆبانیێ گەلەکی خەرابە، پێدڤییا لەزگین ب دەرمان، خوارن و ئاڤێ هەیە؛ ئاڤ نەمایە و نان ب تەمامی کێم بوویە، هەتا ئار ب دەست ناکەڤە.”
دەربارێ ئالیکاریێن ناڤنەتەوەیی دە ژی عەبدولایێ گۆت، “گۆتەگۆتێن شاندنا ئالیکاریا نەتەوەیێن یەکبوویی هەنە لێ هەتا نها ت ئالیکاری نەگهشتیە کۆبانیێ.”
دۆرپێچا ل سەر کۆبانیێ پشتی وێ یەکێ تێ کو ژ بەر ئێرشا ئارتێشا عەرەبان یا سووریەیێ، بەشەک ژ ناڤچەیێن رێڤەبەرییا خوەسەر ژ دەستێ هێزێن سووریەیا دەمۆکراتیک (ههسهدێ) دەرکەتن و ئەڤ یەک بوو سەدەما قوتبوونا وی باژاری ژ ناڤچەیێن دن یێن رۆژئاڤایێ کوردستانێ.
