هەسەدە: شامێ ئاگربەستێ بنپێ کر، زارۆکەک شەھید بوو و 4 شەرڤان بریندار بوون

ناڤەندا راگھاندنێ یا ھێزێن سووریەیا دەمۆکراتیک (ھەسەدێ) ب داخویانیەکێ راگھاند، کۆمێن چەکدارێن سەر ب “حکوومەتا دەمکی” ڤە ئاگربەستا کو دوھ ئێڤارێ کەتبوو وارێ جبجیکرنێ، ب ئاوایەکی خەتەرناک بنپێ دکن. د ئەنجاما ئێرشان دە ل گوندەوارێ کۆبانێ زارۆکەک شەھید بوو و 4 شەرڤانێن ھەسەدێ ژی بریندار بوون.

ل گۆری داخویانیا ھەسەدێ کو شەڤا بۆری 25ێ چلەیێ وەشاند، تەڤی کو ئاگربەست ھاتیە راگھاندن ژی، کۆمێن چەکدار قادێن سڤیل دکن ئارمانج. ھات راگھاندن کو دەمژمێر 10:00ێ ڤێ سبەھێ ل ئەنیا باژارۆکێ چەلەب یێ (باشوورێ رۆژھلاتێ کۆبانێ) ب پانزێران ئێرشەک پێک ھاتیە، لێ ئەڤ ئێرش ژ ئالیێ ھێزێن ھەسەدێ ڤە ھات شکاندن.

ھەر وھا ھات دیارکرن کو ژ نیڤرۆ ڤە ئێرشێن ل سەر گوندێن زێریک و قاسمیێ یێن رۆژئاڤایێ کۆبانێ بەردەوام دکن. ھەسەدێ ئەشکەرە کر کو د ئەنجاما تۆپبارانا ل سەر گوندێ قاسمیێ دە، ژ مالباتەکێ زارۆکەک شەھید بوویە و 3 سڤیلێن دن ژی بریندار بوونە.

بنپێکرنێن ئاگربەستێ نە تەنێ ب کۆبانێ سینۆردار مان، لێ باژارۆکێن گرکێ لەگێ و چلاخا ل ھەرێما جزیرێ ژی راستی ئێرشان ھاتن و د ڤان ھەر دو ئێرشان دە زرارێن مادی یێن مەزن چێبوون.

د داویا داخویانیێ دە ھەسەدێ بانگ ل وەلاتێن گارانتۆر کر کو بەرپرسیاریا خوە ب جھ بینن و وھا گۆت: “ئەم بانگ ل گارانتۆرێن ئاگربەستێ دکن کو سینۆر ژ ڤان بنپێکرنان رە دەینن و کۆمێن شامێ نەچار بکن کو ل گۆری پەیمانێ تەڤبگەرن دا کو ژیانا سڤیلان وەرە پاراستن.”