ئیرۆ سالڤەگەرا 11ێ یا رزگارکرنا کۆبانێیە
11 سال ل سەر رزگارکرنا باژارێ کۆبانێ یێ رۆژئاڤایێ کوردستانێ دەرباس بوون، کو ل سەر داخوازا سەرۆک بارزانی، پێشمەرگەیێن کوردستانێ رۆلەکێ مەزن د تێکبرنا چەکدارێن داعشێ ل کۆبانێ و پاقژکرنا بەشەک گرینگا کوردستانێ ژ تەرۆریستان دە لیستن. لێ پشتی 11 سالان کۆبانێ جارەکە دن نھا د بن دۆرپێچێ دەیە.
پشتی کو چەکدارێن داعشێ د ئیلۆنا 2014ێ دە ئێریشەکە مەزن ل دژی کۆبانێ دەست پێ کرن و ژ سەدی 80ێ یا باژێری کۆنترۆل کرن، د جۆتمەھا ھەمان سالێ دە، ب فەرمانا سەرۆک مەسعوود بارزانی، کو وێ دەمێ سەرۆکێ ھەرێما کوردستانێ بوو و پارلامەنتۆیا کوردستانێ بریار دا کو ھێزا پێشمەرگەیێن کوردستانێ بشینە رۆژئاڤایێ کوردستانێ و رزگارکرنا کۆبانێ ھات پەژراندن.
کاروانا یەکەم یا 150 ھێزێن پێشمەرگەیێن کورد د 28ێ جۆتمەھا 2014ێ دە دەرباسی کۆبانێ بوو، پشترە سێ کاروانێن دن د دەمێن جودا دە. رزگارکرنا کۆبانێ ژ ئالیێ ھێزێن پێشمەرگە ڤە بێ قوربانی نەبوو. شەھیدێ یەکەمێ پێشمەرگەیێن کورد ل کۆبانێ زێرەڤان مزووری بوو.
شەھید زێرەڤان د سالا 1991ێ دە ژ دایک بوویە، ئەو خوەندەکارێ سالا دویەمین یا بەشا زمانێ کوردی یا زانینگەھا سۆران بوو. وی ژ بۆ پاراستنا وەلاتێ خوە رۆخسەت وەرگرتبوو. 20ی کانوونا 2015ێ ل کۆبانێ شەھید بوو.
ب پشتگریا ھێزێن پێشمەرگێن کوردستانێ و بالافرێن هەڤپەیمانیێ، د 26ێ کانوونا 2015ێ دە، شەرڤانێن رۆژئاڤایێ کوردستانێ تەڤاھیا باژارێ کۆبانێ ژ نوو ڤە کۆنترۆل کرن. پشتی تۆمارکرنا ڤێ سەرکەفتنا دیرۆکی، ھێزێن پێشمەرگە د 22یێ نیسانا 2015ێ دە ڤەگەریان ھەرێما کوردستانێ.
د ھەڤپەیڤینەک تەلەڤیزیۆنی دە، سەرۆک بارزانی گۆت: “نە بریارەک ھێسان بوو، لێ بریارەک دیرۆکی، نەتەوەیی و مرۆڤی بوو. بریارێ پشتەڤانیا کوردستانێ و ناڤنەتەوی یا بەرفرەھ ل دوو خوە ئانی و بریارەکی د جیھ دە و گەلەک بەرھەمدار بوو.”
پشتی 11 سالان، ئارتێشا عەرەبی یا سووریێ و کۆمێن چەکدارێن نێزیکی حکوومەتا شامێ ئێریشەک مەزن ل دژی رۆژئاڤایێ کوردستانێ و باژارێ کۆبانێ دەست پێ کرن و نھا باژارێ کۆبانێ دۆرپێچ کرنە.
د سەردانا خوەیا ڤاتیکان و نوونەرتیا حکوومەتا ھەرێما کوردستانێ ل رۆمایێ دە، سەرۆک بارزانی ژ رۆژنامەڤانان رە گۆت کو کۆبانێ جیهەک ستراتەژیک و نەتەوەیییە و گۆت: ئەگەر وەکی سالا 2014ێ دەرفەت ھەبا، ئەز دا دوبارە ھێزا پێشمەرگە بشینم کۆبانێ.
ھەروەھا راگەھاند؛ من دەزگەها خێرخوازی یا بارزانی ئەرکدارکر کو ئالیکاریێن مرۆڤی بگھینە خوشک و برایێن خوەیێن ل رۆژئاڤایێ کوردستانێ.
پشتی ڤێ پەیاما سەرۆک بارزانی، دەزگەها خێرخوازی یا بارزانی دوھ یەکشەمبێ، 25ێ کانوونا پێشین یا 2026ێ، ب گھاندنا ئالیکاریا مرۆڤی یا خوارن، سۆتەمەنی و پێدڤیێن دن یێن رۆژانەیێن وەلاتیان، دۆرپێچا ل سەر کۆبانێ شکاند.
