وەزارەتا پێشمەرگە كۆبانێ چ جاران ناكهڤیت
وەزارەتا پێشمەرگە یا حکوومەتا هەرێما کوردستانێ د سالڤەگەرا 11ێ یا رزگارکرنا باژارێ کۆبانیێ دە پەیامەکا رێزلێگرتنێ وەشاند و تێ دە بەرخوەدانا ئەفسانەیی یا پێشمەرگە و شەرڤانان ل دژی تەرۆریستێن داعشێ پەسناند.
وەزارەتا پێشمەرگە یا حکوومەتا هەرێما کوردستانێ تەکەز کر کو، ئەو سەرکەفتنا دیرۆکی بەرهەما یەکرێزی و فەداکاریا هەمی وان قەهرەمانان بوو یێن کو رێ ل بەر کەتنا وی باژاری گرت و د شەرەکێ بێهەمپا دە رێخستنا تەرۆریستی یا هەری هۆڤ شکاند.
د راگهاندنا وەزارەتا پێشمەرگە دە هاتیە کو، بەری 11 سالان پێشمەرگە و شەرڤانان مل ب مل د یەک ژ شەرێن هەری دژوارێن سەدسالا 21ێ دە ب ئیرادەیەکا پۆلایی کاری کۆبانیێ ژ دەستێ تەرۆرێ رزگار بکن.
وەزارەتێ ناڤبری ئاماژە ژی دا: ئەو سەرکەفتن نە تەنێ دەستکەفتیەکا لەشکەری بوو، بەلکی سەرکەفتنا ئیرادەیا ژیانێ و جانێ مرۆڤاهیێ ل سەر فکرا توندرێ و هۆڤیتیێ بوو. وەزارەتا پێشمەرگە سلاڤ ژ وان پێشمەرگە و شەرڤانان رە شاندن یێن کو ب خوینا خوە رێیا دیرۆکێ گوهەرت و روومەتا گەلێ کورد پاراست.
وەزارەتا پێشمەرگە یا حکوومەتا هەرێما کوردستانێ تەکەز ژی کر کو، ئیرادەیا سەرکەتنێ دێ ب عەینی روحێ بەرخوەدانا وێ دەمێ بەردەوام بە و کۆبانی دێ سەربلند بمینە.
وەزارەتا پێشمەرگە هەروەسا سلاڤ ژ بۆ جانێ پاقژێ شەهیدان شاندن و تەکەز ل سەر گرینگیا یەککدەستی و یەکرێزیا نەتەوەیی وەکی یەکانە رێیا دەربازبوونا ژ خەتەریان و پاراستنا ئاشتی و تەناهیێ کر.
شەرێ کۆبانیێ ل پاییزا سالا 2014ێ هات دەستپێکرن و ژ بۆ دەما چەند مەهان بالا جیهانێ کشاند. د جۆتمەها وێ سالێ دە، ب بریارا سەرۆک بارزانی و پەژراندنا پارلامەنتۆیا هەرێما کوردستانێ، هێزەکا پێشمەرگەیان ژ بۆ پشتگریا شەرڤانان ل کۆبانیێ هات شاندن، کو ئەو جارا یەکێ بوو د دیرۆکا نوو دە کو پێشمەرگە ژ بۆ پشتگریا پارەکا دن یا کوردستانێ ژ سینۆران دەرباز ببە.
د 26ێ چلەیا سالا 2015ێ دە، ئەو باژار ب تەڤاهی ژ تەرۆریستێن داعشێ هات پاقژکرن، ئەو یەک ژی ژ بۆ هلوەشینا وێ رێخستنێ ل سەرانسەرێ جیهانێ بوو دەستپێکەک. ئیرۆ 11 سال د سەر وێ بوویەرا دیرۆکی رە دەرباز بوون و وەکی سەمبۆلا هەڤگرتنا هێزا کوردان تێ ببیرانین.
