مەزلووم عەبدی ل شامێیە

فەرماندارێ گشتی یێ ھێزێن سووریەیا دەمۆکراتیک (ھەسەدێ) گھیشتیە شامێ، ژ بۆ کو دانووستاندنێن نوو لگەل سەرۆکێ سووریەیێ ل سەر تەڤلیھەڤکرنا ھێزێن سووریەیا دەمۆکراتیک (ھەسەدێ) لگەل ئارتێشا سووریەیێ بکە.

فەرماندارێ گشتییێ ھێزێن سووریەیا دەمۆکراتیک (ھەسەدێ) مەزلووم عەبدی و بەرپرسا تێکلیێن دەرڤە یا رێڤەبەریا خوەسەر یا دەمۆکراتیکا ھەرێما باکور و رۆژھلاتێ سووریەیێ ئیلھام ئەحمەد ئیرۆ رۆژا سێشەمب، 27/1/2026ێ، ژ بۆ دانوستاندنێن راستەراست لگەل سەرۆکێ سووریەیێ ئەحمەد شەرع گھیشتنە شامێ.

بریارە کو د ڤێ سەردانێ دە، دانوستاندنێن بەرفرەھ ل سەر مژارا ھەڤگرتن و گھیشتنا ب رێکەفتنا داویێ بێن کرن.

ل گۆری زانیاریان، ئارمانجا سەرەکی یا سەردانا مەزلووم عەبدی و ئیلھام ئەحمەد ژ بۆ شامێ دەستپێکرنا قۆناغەکا نوویا دانوستاندنێن ل سەر میکانیزما ھەڤگرتنا رێڤەبەریا خوەسەر و ھێزێن وێ یێن لەشکەری لگەل حکوومەتا سووریەیێ یە.

ئەڤ پێنگاڤ پشتی وێ یەکێ تێ کو، د چەند رۆژێن بۆری دە ئالۆزیێن لەشکەری ل دەڤەرێ چێ بوونە، لێ نھا ھەر دو ئالییان ژ بۆ چارەسەرکرنا پرسگرێکان ڤەبژارکا دیالۆگێ ھلبژارتیە.

ئەڤ تەڤگەرێن دیپلۆماتیک د دەمەکێ دە نە کو، وەزارەتا بەرەڤانیێ یا سووریەیێ و ھێزێن ھەسەدێ ل سەر درێژکرنا ئاگربەستێ ژ بۆ دەما 15 رۆژێن دن ل ھەڤ کریە. ڤێ بریارێ، کو ب ناڤبەینکاریا ناڤدەولەتی پەیدا بوویە، ژینگەھەکا گونجایی ژ بۆ پێڤاژۆیا ڤەگوھەستنا گرتیێن داعشێ ژ سووریەیێ بۆ ئیراقێ پەیدا کریە و ھەروەسا دەرفەتەکا گرینگ دایە ئالیێن کوردی و حکوومەتا شامێ، دا کو پرسگرێکێن سیاسی و لەشکەری ب رێیا دانوستاندنان چارەسەر بکن.