وەزارەتا ناڤخوە یا سووریەیێ: ناسنامە ب تەڤایا کوردێن سووریەیێ تێ دان

وەزیرێ ناڤخوە یێ سووریەیێ د نڤیسارەکا لەزگین دە، کو ژ بۆ برێڤەبریا گشتی یا کارووبارێن سڤیلان شاندیە، بریارا بجھانینا بریارنامەیا ھەژمار 13 یا چلەیا ئیسال دەرخست، کو ل گۆری وێ ھەمی بەرماھیێن سەرژمێریا سالا 1962یێ دێ هێن ھلوەشاندن و ناسنامە دێ ب وەلاتیێن کورد یێن شێنیێن سووریەیێ بێ دان.

وەزارەتا ناڤخوەیا سووریەیێ ئیرۆ رۆژا چارشەمبی، 28/1/2026ێ، د نڤیسارەکا فەرمی دە، کو وێنەیەکێ وێ ب دەست مەدیایان کەفتیە، رێنمایێن بەرفرەھ و لەزگین ژ “برێڤەبریا گشتی یا کارووبارێن سڤیلان (نفووس)” شاندنە، دا کو ناڤەرۆکا بریارنامەیا کۆماری یا ھەژمار 13 یا سالا 2026ێ، کو گرێدایی چارەسەرکرنا پرسگرێکا ناسنامەیا کوردان ل وی وەلاتییە، ب جیھ بینە.

ل گۆری وێ نڤیسارێ کو ئیمزەیا وەزیرێ ناڤخوەیێ سووریەیێ لیوا ئەنەس خەتاب ل سەر ھەیە و ب لەز ھاتیە شاندن، تەکەز ل سەر بجھانینا مادەیا 4ێ یا وێ بریارنامەیێ ھاتیە کرن و دبێژە: کارکرنا ب ھەمی قانوون و رێکارێن ئاوارتەیێن کو ئەنجامێن سەرھەژمێریا سالا 1962یێ ل پارێزگەھا حەسەکەیێ بوون دێ بێ ھلوەشاندن.

د بەشەکا دن یا وێ بریارنامەیێ دە ھاتیە گۆتن کو دڤێت، “ناسنامەیا سووریەیی ب وەلاتیێن ب ئەسلێ خوە کوردێن کو شێنیێن سووریەیێ نە بێ دان، ھەتا یێن کو نەھاتنە قەیدکرن ژی، ئەو ژی ب وەکھەڤیا تەمام د ماف و ئەرکان دە.”

ل گۆری خالا 7ێ یا وێ بریارنامەیێ، وەزیرێ ناڤخوەیێ سووریەیێ فەرمان ل برێڤەبریا کارووبارێن سڤیلان کر کو تاڤلێ دەست ب ئامادەکرنا رێنمایێن بجیھانینێ بکە.

د وێ نڤیسارێ دە ھەروەسا ھاتیە گۆتن: ھێسانکرنا رێکاران ژ بۆ خەلکێ مەیێ کورد ب قاسی کو موومکن بە ل بەر چاڤ بێ وەرگرتن.

وەزارەتا ناڤبری ژ بۆ تەمامکرنا ڤان رێکاران دەمەکا کورت دەستنیشان کریە و داخواز کریە کو، دڤێت پێنگاڤ و رێنما ھەری دەرەنگ ھەتا 5ێ شباتا 2026ێ بێن تەمامکرن و وەزارەت ل سەر وێ بێ ھایدارکرن.

ئەڤ بریار وەکی وەرچەرخانەکا دیرۆکی ژ بۆ کوردێن سووریەیێ تێ حەسباندن، کو گەلەک ژ وان ژ بەر سەرھەژمێریا سالا 1962یێ ژ مافێ وەلاتیبوونێ ھاتبوون بێپارکرن و وەکی “بیانی” یان “مەکتووم” سەرەدەری پێ رە دھات کرن.