رەوەندا کورد ل ئالمانیایێ ژ بۆ پشتگریا رۆژئاڤایێ کوردستانێ داکەتن کۆلانان
ب ھەزاران کوردێن ل ئالمانیا دژین، ل چەند باژارێن وەکی (کۆلن، دووسسەلدۆرف و بۆنن) ژ بۆ پشتگریا رۆژئاڤایێ کوردستانێ و ژ بۆ پرۆتەستۆکرنا ئێریشێن ئارتێشا سووریێ ل سەر کوردان، خوەپێشاندانا ھەری مەزن ل باژارێ بۆننێ لدارخستن.
ل گۆری ئاژانسا نووچەیانا ئالمانی دو، کو یەک ژ ئاژانسێن ھەری گرنگ و مەزن یێن وی وەلاتیە، خوەپێشاندەر ژ بۆ پرۆتەستۆکرنا رەوشا رۆژئاڤایێ کوردستانێ کۆم بوون، کو ھێزێن حکوومەتا سووریێ د ھەفتەیێن داوی دە ئێریشی گەلەک دەڤەران کرنە و دەست دانین سەر ھندەک جیھا و ھێزێن سووریا دەمۆکراتیک (ھەسەدێ) ژ ھەژمارەک باژارۆک و گوندان ڤەکشیانە.
نێزیکی 15 ھەزار کەس ل بۆننا ل رۆژئاڤایێ ئالمانیایێ کۆم بوون دا کو ل دژی رەوشا ھەیی یا نفووسا کورد ل باکورێ سووریێ پرۆتەستۆ بکن. چەند سەد پۆلیسێن ئالمان ل ور بوون دا کو چاڤدێریا خوەپێشاندانێ بکن و پێشی ل ئالۆزیان بگرن. میتینگ بێ بوویەر ب داوی بوو و ژ ئالیێ دن ڤە کوردێن کو ل باژارێن شتوتتگارت و ژێنا دژین ژی خوەپێشاندان کرن.
چەند رۆژ بەرێ، ب سەرۆکاتیا ئامەریکایێ حکوومەتا سووریێ و ھەسەدێ ل ھەڤ کرن و ئاگربەست راگھاندن.
د شەرێ ل دژی داعشێ دە ل سووریێ، ھێزێن سووریا دەمۆکراتیک (ھەسەدێ) وەکی ھەڤالبەندێ ھەری گرینگێ ئامەریکایێ د شەر دە دھاتن دیتن، لێ پشتی ھلوەشینا رەژیما بەشار ئەسەد و ھاتنا ئەحمەد شەرع سەر دەستھلاتێ، واشنگتۆن نێزیکی شامێ بوو.
دەولەتێن یەکبوویی یێن ئامەریکایێ د ھەفتەیێن داوی دە ب ئاوایەکی لەشکەری موداخەلەیی شەر نەکر، لێ زەخت ل ھەر دو ئالیان کر دا کو لھەڤکرنەکێ بکن.
