پەیمانا د ناڤبەرا هەسەدێ و شامێ دە ئیرۆ تێ جیبجیکرن
بریارە ئیرۆ پێڤاژۆیا جیبجیکرنا “پەیمانا گشتی”یا ناڤبەرا ھێزێن سووریەیا دەمۆکراتیک (ھەسەدێ) و حکوومەتا سووریەیێ ب فەرمی دەست پێ بکە. ژ بۆ پاراستنا ئەولەھیێ، ل باژارێن قامشلۆ و حەسەکێ قەدەغەیا دەرکەتنا دەرڤە ھات راگھاندن.
ل گۆری ئاگاھیێن کو ژ ھەرێمێ ھاتنە بدەستخستن، ئیرۆ 2ێ شوباتا 2026ێ، د چارچۆڤەیا قۆناغا یەکەما پەیمانا ناڤبەرا ھەسەدێ و شامێ دە، ھێزێن ئەولەھیێ یێن حکوومەتا سووریەیێ ل “چارگۆشەیا ئەولەھیێ”یا قامشلۆیێ ھاتن بجھکرن. ھەڤدەم ل گەل ڤێ لڤ و تەڤگەرا بەژایی، فرۆکەیێن شەرێن ھەڤپەیمانیا ناڤدەولەتی ژی ل سەر ئاسیمانێ ھەر دو باژاران (قامشلۆ و حەسەکێ) دفرن.
ھێزەکا نوویا لەشکەری تێ ئاڤاکرن
د قۆناغا یەکەما ڤێ پەیمانێ دە کو تێ پایین مەھەکێ بدۆمە، فیرقەیەکا نوویا لەشکەری ژ بۆ پارێزگەھا حەسەکێ تێ ئاڤاکرن. ئەڤ فیرقە دێ ژ 3 لیوایان و نێزیکی 16 ھەزار شەرڤانێن ھەسەدێ پێک بێ. ھەر وھا لیوایەکا تایبەت ژی ژ بۆ ھێزێن کۆبانێ تێ ئاڤاکرن کو دێ سەر ب فیرقەیەکا پارێزگەھا حەلەبێ ڤە بە.
رادەستکرنا فرۆکەخانە، دەرگەھ و بیرێن نەفتێ
پشتی کو فرۆکخانەیا قامشلۆ و دەرگەھێن سینۆری رادەستی دەستھلاتێن حکوومەتێ ھاتن کرن، د قۆناغا دویەم دە دێ کیلگەھێن نەفتێ یێن رمێیلان و سوەیدیێ ژی رادەستی وەزارەتا ئەنەرژیێ یا سووریەیێ وەرن کرن. د وارێ ئیداری دە ژی، ھەموو سازیێن رێڤەبەریا خوەسەر دێ ب سازیێن دەولەتێ رە وەرن یەککرن و کارمەندێن سڤیل دێ د پۆستێن خوە دە وەرن میسۆگەرکرن.
قەدەغەیا ھاتووچوونێ و تەدبیرێن ئەولەھیێ
ھێزێن ئەولەھیا ھندورین (ئاساییش) راگھاند، قەدەغەیا ھاتووچوونێ ل حەسەکێ و قامشلۆیێ ھەتا دەمژمێر 18:00ێ ئێڤارێ بەردەوام دکە. ئەڤ بریار ژ بۆ رێگرتنا ل ھەر ئالۆزی و پووچکرنا ھەولدانێن تێکبرنا ئەولەھیێ ھاتبوو ستاندن. ئاساییشێ ھشیاری دا کو دێ ل دژی ھەر بنپێکرنەکێ تەدبیرێن توند وەرن گرتن.
داتایێن پەیمانا 14 خالی:
پەیمانا کو د 29ێ چلەیا 2026ێ دە ھاتبوو ئیمزاکرن، ژ ڤان خالێن سەرەکی پێک تێ:
1- ئاگربەست و گرتیگەھ: راگھاندنا ئاگربەستەکا گشتی و پاراستنا گرتیگەھێن داعشێ ژ ئالیێ ھەسەدێ ڤە ب پشتگریا لۆژیستیکا دەولەتێ.
2- ڤەکشینا لەشکەری: ڤەکشینا ھەسەدێ ژ ناڤەندێن باژاران بەر ب کامپێن لەشکەری ڤە و ڤەکشینا ئارتێشا سووریەیێ ژ بۆ ناڤچەیا شەدادیێ.
3- یەککرنا ھێزێن ئەولەھیێ: ھێزێن ئاساییشێ دێ ب وەزارەتا ناڤخوەیی یا سووریەیێ رە وەرن یەککرن.
4- دابەشکرنا پۆستان: پارێزگارێ حەسەکێ دێ ژ ئالیێ ھەسەدێ ڤە و فەرماندارێ پۆلیسان دێ ژ ئالیێ حکوومەتێ ڤە وەرە دیارکرن. ھەر وھا ئالیکارێ وەزیرێ بەرگریێ دێ ببە کاندیدێ ھەسەدێ.
5- دەرگەھێن سینۆری: دەرگەھێن سێمالکا و نسێبینێ ژ بۆ گەشتێن سڤیل و بازرگانیێ ب فەرمی تێن ڤەکرن.
6- باوەرنامەیێن خوەندنێ: ھەموو باوەرنامەیێن دبستان و زانینگەھێن رێڤەبەریا خوەسەر ژ ئالیێ دەولەتێ ڤە تێن قەبوولکرن.
7- زمان و پەروەردەیا کوردی: گۆتووبێژ ل سەر تایبەتمەندیێن پەروەردەیا کوردی ب وەزارەتا پەروەردەیێ رە بەردەوام دکن.
8- ڤەگەرینا کۆچبەران: ڤەگەراندنا کۆچبەرێن عەفرین، سەرێ کانیێ و گرێ سپی ژ بۆ سەر مال و ملکێن وان تێ میسۆگەرکرن.
9- رەوشا مەدیایێ: دەستوورا کارکرنێ ژ بۆ ھەموو سازی و دەزگەھێن مەدیایی یێن ھەرێمێ ل گۆری قانوونێن سووریەیێ تێ دایین.
تێ چاڤەرێکرن کو ئەڤ پەیمان د ناڤا پێنج قۆناغان دە ب تەمامی بکەڤە وارێ جبجیکرنێ و داوی ل ناکۆکیێن سیاسی و لەشکەری یێن گەلەک سالان بینە.
