شاندەکا ئەنەکەسێ ب سەرۆکاتیا محەمەد ئیسماعیل گھیشت شامێ
شاندەکە سەرۆکاتیا ئەنجوومەنا نشتیمانی یا کوردی ل سووریەیێ (ئەنەکەسە) ب ئارمانجا ئەنجامدانا ھەڤدیتنان لگەل بەرپرسێن پلەبلندێن حکوومەتا سووریەیێ، گھیشت شامێ، پایتەختا سووریەیێ.
ل گۆری ئاگاهیان، ل سەر ڤەخوەندنەکا فەرمی یا وەزارەتا دەرڤەیا سووریەیێ، شاندەکا سەرۆکاتیا ئەنەکەسێ ب سەرۆکاتیا سەرۆکێ ئەنەکەسێ محەمەد ئیسماعیل ئیرۆ 2یێ شوباتێ، گھیشت شامێ.
پێشتر ئەندامێ دەستەیا سەرۆکاتیا ئەنەکەسێ سلێمان ئۆسۆ راگھاندبوو، ئۆفیسا وەزیرێ دەرڤەیێ سووریەیێ لگەل وان پەیوەندی دانیە و داخوازا ھەڤدیتنێ لگەل سەرۆکاتیا ئەنەکەسێ کریە. ئەنەکەسێ ئەڤ ڤەخوەندن قەبوول کریە، دا کو نێرینێن خوەیێن سیاسی و داخوازێن گەلێ کورد ل شامێ بینە زمان.
پابەندبوونا ب ‘یەکرێزیا کوردی’
سلێمان ئۆسۆ دەربارێ ڤێ سەردانێ و ھەلوەستا ئەنەکەسێ دە تەکەزی ل سەر بریارێن کۆنفەرانسا 26ێ نیسانا 2025ێ کر و گۆت: “ئەم وەک ئەنەکەسە، ھەر پابەندی بریارێن کۆنفەرانسا 26ێ نیسانێ یا یەکرێزیا کوردی و شاندا ھەڤبەشا کوردی نە. ئارمانجا مەیا ھەری بلەز د ڤێ قۆناغێ دە ئەوە کو ھەرێمێن کوردی ژ شەر بێن پاراستن.”
داخوازا ئاکتیڤکرنا شاندا ھەڤبەشا کوردی
سلێمان ئۆسۆ د داخویانیێن خوە دە دەستنیشان کربوو کو ئەو دخوازن ھەڤدیتنەکا سیاسی یا بەرفرەھ د ناڤبەرا شاندا کوردی یا ھەڤبەش و حکوومەتا سووریەیێ دە پێک بێ، دا کو چارەسەریەک ژ بۆ پرسگرێکا کورد و کریزا سووریەیێ وەرە دیتن.
