ھێزا وەزارەتا ناڤخوە یا سووریەیێ چوو ناڤ قامشلۆیێ

ھێزەکا وەزارەتا ناڤخوە یا سووریەیێ ئیرۆ رۆژا سێشەمب، 3یێ شوباتا 2026ێ، د چارچۆڤەیا پەیمانا دوئالی یا د ناڤبەرا ھێزێن سووریەیا دەمۆکراتیک (ھەسەدێ) و حکوومەتا شامێ دە چوو ناڤ باژارێ قامشلۆیێ.

ئەو ھێزا وەزارەتا ناڤخوەیا سووریەیێ، کو ژ 15 وەساییتێن لەشکەری و 125 ئەندامان پێک تێ، ب ھەڤاھەنگیا ئەولەکاریا ناڤخوەیی یا قامشلۆیێ یا گرێدایی ھەسەدێ چوو ناڤ باژارێ قامشلۆیێ.

وەکی بزاڤەکێ ژ بۆ رێگرتنا ل ھەر نەخوەشی و ئالۆزیەکێ د دەما ھاتنا ھێزا وەزارەتا ناڤخوە یا سووریەیێ دە، ژ دەمژمێر 06:00 سبەھا ئیرۆ ڤە قەدەغەیا گشتی یا ھاتن و چوونێ ل قامشلۆیێ و دەردۆرا وێ ھاتیە راگھاندن.

ئەڤ ژی د دەمەکێ دەیە کو، دوھی رۆژا دوشەمب، 2یێ شوباتا 2026ێ، ھەر د چارچۆڤەیا وێ پەیمانا کو ھاتیە راگھاندن دە، ھێزێن ناڤخوەیی یێن سووریەیێ چوون ناڤ ھەر دو باژارێن حەسەکە و کۆبانیێ یێن رۆژئاڤایێ کوردستانێ.

برێڤەبرێ نوویێ ئەولەھیا حەسەکەیێ (گرێدایی شامێ) مەروان عەلی د داخویانیەکا رۆژنامەڤانیێ دە راگھاند کو، ھەمی بەندێن وێ پەیمانێ پێنگاڤ پێنگاڤ دێ بێن بجیھانین.