رەوانگەھا سووریەیێ: نێزیکە ئاڤ و خوارن ل کۆبانیێ نەمینن
رەوانگەھا سووریەیێ یا مافێن مرۆڤان د راگھاندنەکێ دە، راگھاند کو، رەوشا مرۆڤی ل باژارێ کۆبانیێ ب ئاوایەکێ مەترسیدار خراب بوویە، ھەروەسا ئەو باژار ئێدی نکارە وێ پێلا مەزن یا ئاوارەیان وەرگرە، ژ بەر ڤێ یەکێ ژی دابینکرنا پێدڤیتیێن بنگەھین یێن وەلاتیان و ئاوارەیان نێزیکە ب تەڤاھی نەمینن، ھەروەسا ھایداریێ ل سەر کارەساتەکا تەندورستی و مرۆڤی ددە.
رەوانگەھا سووریەیێ یا مافێن مرۆڤان ل سەر زارێ چاڤکانیێن خوەجھی و شاھدان بەلاڤ کریە کو، ب ھەزاران ئاوارە ل کۆبانیێ د شەرت و مەرجێن دژوار دە دژین، ژ بەر کێمبوونا خوارنێ، ئاڤا ڤەخوارنێ یا پاقژ و دەرمانان دنالن، ھەروەسا بەلاڤبوونا نەخوەشیان ب رەنگەکێ بەرچاڤ زێدەبوویە، ب تایبەتی ژی د ناڤ زارۆکان دە، ژ بەر نەبوونا شیرێ زارۆکان و پێدڤیێن پژیشکی یێن بنگەھین.
شێنیێن کۆبانیێ و ئاوارە خوە دسپێرن ئاڤا بیران، ژ بەر نەبوونا چاڤکانیێن ئاڤا پاقژ، زانیاریێن پزیشکی و مەیدانی ئاماژەیێ ددن پیسبوونا ڤان ئاڤان ژ بەر تەڤلیھەڤبوونا وان ب ئاڤا ئاڤرێیان رە، کو بوویە سەدەما ژەھرینبوونا جەماوەری.
کارمەندێن پزیشکی دبێژن کو، نەخوەشخانەیا گشتی یا کۆبانیێ ھەر رۆژ پێشوازیا زێدەتر ژ 500 بوویەرێن ژەھرینبوونێ دکە کو پرانیا وان زارۆک و ژنن. ئەڤ کەس تووشی ڤەرەشین، زکچوون و ئێشا زکی بوون. چاڤکانیێن تەندورستیێ ھایداریێ ددن کو، بەردەوامبوونا ل سەر بکارئانینا ڤێ ئاڤا پیس دێ رەوشا تەندورستیێ ژ کۆنترۆلێ دەرخە.
ئاماژە ژی دا کو، پرانیا نەخوەشخانە و ناڤەندێن تەندورستیێ ل کۆبانیێ ژ کار کەفتنە. نەمانا گازۆیلێ ژ بۆ خەبتاندنا ژەنەراتۆران ژی پرسگرێکەکا دنە، کو باندۆرەکا راستەراست ل سەر ئۆدەیا ئۆپەراسیۆنان و پارێن چاڤدێریا گران کریە و بوویە سەدەما راوەستاندنا گەلەک خزمەتێن پزیشکی.
ھەروەسا دەزگەھێن تەندورستیێ ژ بەر نەبوونا دەرمانێن سەرەکی و پێدڤیتیێن پزیشکی دنالن، وەکی مادەیێن بێھشکرنێ و ئانتیبیۆتیکان، کو ئەڤ یەک ژی بوویە سەدەم کو کارمەندێن پزیشکی گەلەک ئۆپەراسیۆنان پاش بخن یان ژی ھلوەشینن، کو ژیانا نەخوەشان، ب تایبەت ژی یێن کو نەخوەشیێن دەمدرێژ ھەنە، دخە مەترسیێ.
رەوانگەھا سووریەیی یا مافێن مرۆڤان ھایداریێ ددە کو، راوەستیانا فرنان ل کۆبانیێ دێ ببە سەدەما کریزەکا گران یا ئەولەھیا خوارنێ.
کۆبانی ھەروەسا رووبروویی پێلەکا مەزنا ئاوارەیان بوویە، ب گھیشتنا ب دەھان ھەزار ئاوارەیان ژ زێدەتر ژ 200 گوندان د دەمەکا کورت دە، ژ بلی ئاوارەیێن کامپا تەل سامەنێ و ب ھەزاران مالباتان ژ باژارێن تەبقا و رەقایێ. ڤێ پێلا مەزن زەختەکا زێدە خستیە سەر ژێرخانەیا وی باژاری و خزمەتکاریێن بنگەھینێن وەکی ئاڤ، ئەلەکتریک، تەندورستی و پەروەردەیێ.
