نێچیرڤان بارزانی و شاندەیەکا کۆنگرێسا ئەمریکایێ جڤیان

سەرۆکێ هەرێما کوردستانێ، نێچیرڤان بارزانی د چارچۆڤەیا کۆنفەرانسا ئەولەکاریێ یا مونشنێ دە، ئیرۆ 14ێ شوباتێ لگەل سیناتۆرێ کۆمارپارێز لیندسی گراھام و شاندەیەکا کۆنگرێسا ئامەریکایێ یا کو ژ چەند ئەندامان پێک دھات، جڤیا.

سەرۆکاتیا ھەرێما کوردستانێ بەلاڤ کر، د جڤینێ دە پەیوەندیێن ئامەریکایێ یێن لگەل ئیراق و ھەرێما کوردستانێ و پێشخستنا ھەڤکاریێن دوئالی ھاتن نرخاندن. نێچیرڤان بارزانی سپاسیا ئەمریکا و کۆنگرێسێ کر ژ بۆ پشتگریا وان یا بەردەوام یا د وارێن جودا دە.

شاندەیا کۆنگرێسێ تەکەزی ل سەر گرنگیا پێگەھا ھەرێما کوردستانێ وەکی فاکتۆرەکا سەرەکی یا ئارامیێ ل ھەرێمێ کر و پشتگریا خوە ژ بۆ پاراستنا قەوارا دەستووری یا ھەرێما کوردستانێ و چارەسەرکرنا کێشەیێن د ناڤبەرا ھەولێر و بەغدایێ دە نیشان دا.

مژارەکا دن یا جڤینێ، رەوشا سووریەیێ و پاشەرۆژا کوردان یا د وی وەلاتی دە بوو. ھەر دو ئالیان تەکەزی ل سەر وێ یەکێ کرن کو دڤێت مافێن کوردان و ھەموو پێکھاتەیێن دن ھەم د رەوشا نھا دە و ھەم ژی د دەستوورا بهێت یا سووریەیەکا یەکگرتی دە، وەرن پاراستن و میسۆگەرکرن.

داوی پێشھاتێن ئەولەھیێ و مەترسیێن ل سەر ڤەگەرا تەرۆرێ مژارەکا دن یا ھەڤدیتنێ بوو.