ئۆجالان: ئەز دخوازم راستەراست لگەل مەدیایێ باخڤم
ئەنداما شاندەیا پارتیا وەکھەڤی و دەمۆکراسیێ یا گەلان (دەم پارتی) پەرڤین بولدان، زانیاریێن نوو دەربارێ ھەڤدیتنا لگەل عەبدوللاھ ئۆجالان پارڤە کرن. بولدان ئەشکەرە کر کو ئۆجالان د ھەڤدیتنا داوی یا ل گراڤا ئیمرالیێ دە تەکەزی ل سەر مافێن خوە یێن قانوونی کریە.
پەرڤن بولدان دیار کر، عەبدوللاھ ئۆجالان لدارخستنا کۆنفرانسەکی رۆژنامەڤانیێ وەکی بەشەک ژ مافێن خوەیێن یاسایی دبینە و ھێڤی دکە کو رایەدارێن ترکیەیێ د دەمەکە نێزیک دە رێ بدن ڤێ داخوازێ. ھات گۆتن ژی، ئۆجالان دخوازە ب ڤی رەنگی پەیامێن خوەیێن سیاسی ب ئاوایەکی شەفاف و بێ ناڤبەینکار بگھینە گەل.
ل گۆری گۆتنێن بولدان، د ھەڤدیتنێ دە رەوشا تەندورستی و ژیانا ئۆجالان، گەشەدانێن داوی یێن پێڤاژۆیا چارەسەریا سیاسی و ھەر وھا ئامادەکاریێن قانوونی یێن ژ بۆ وان چەکدارێن کو دخوازن چەکێن خوە دەینن، ھاتنە گۆتووبێژکرن. بولدان دەستنیشان کر، تەندورستیا ئۆجالان باشە و وی ئامادەھیا خوەیا ژ بۆ بەردەوامکرنا پشتگریا رێیا سیاسی نیشان دایە.
بولدان دەستنیشان کر ژی، ژ ئۆجالان ھاتبوو خواستن کو پرسێن رۆژنامەڤانان ب ئاوایەکی نڤیسکی بەرسڤ بدە، لێ وی ئەڤ یەک قەبوول نەکریە. ئۆجالان ل سەر داخوازا خوەیا ژ بۆ ھەڤپەیڤینێن رووبروو یان ژی کۆنفرانسەکی رۆژنامەڤانیێ یێ بەرفرەھ، ب بریارە.
پەرڤین بولدان د داویا ئاخافتنا خوە دە تەکەز کر، وەکی دەم پارتی ئەو دێ ژ بۆ بەرفرەھکرنا کانالێن پێوەندیێ یێن لگەل عەبدوللاھ ئۆجالان ھەولدانێن خوە بەردەوام بکن و شۆپینەرێ داخوازێن وی بن.
