شام و هەسەدە ل سەر پێنگاڤێن تەڤلیکرنا ھێزێن لەشکەری جڤیان

سەرۆکەرکانێ گشتی یێ سووریەیێ و شاندەیەکا ھێزێن سووریەیا دەمۆکراتیک (ھەسەدێ) ل شامێ جڤیان. د جڤینێ دە پێنگاڤێن پراکتیکی یێن تەڤلێکرنا ھەسەدێ د ناڤا ئارتێشا سووریەیێ دە ھاتن نرخاندن.

سەرۆکەرکانێ گشتی یێ ئارتێشا سووریەیێ لیوا عەلی ناسان، دوھ ئێڤارێ 22یێ شوباتێ ل شامێ پێشوازی ل شاندەیەکا ھێزێن سووریەیا دەمۆکراتیک (ھەسەدێ) کر. ل گۆری داخویانیا وەزارەتا بەرەڤانیێ یا سووریەیێ، د جڤینێ دە مژارا سەرەکی “یەککرنا ھێزێن لەشکەری” بوو.

مەدیایا فەرمی یا سووریەیێ راگھاند، د ھەڤدیتنێ دە پێنگاڤێن تەڤلێکرنا یەکینەیێن ھەسەدێ د ناڤا چەند لیوایێن فیرقەیێن ئارتێشا عەرەبی یا سووریەیێ دە، بەلاڤبوونا لەشکەری یا ل سەر ئەردێ و ھندەک پێنگاڤێن ئیداری یێن گرێدایی ڤێ پێڤاژۆیێ ھاتنە گۆتووبێژکرن.

ژ بۆ برێڤەبرنا ڤێ پێڤاژۆیێ ژی، سەرۆکاتیا کۆمارا سووریەیێ رۆژا 21ێ شوباتێ راگھاندبوو، عەمید زیاد ئەل-عایەش وەک موونەرێ سەرۆکاتیێ ژ بۆ شۆپاندن و جیبجیکرنا خالێن پەیمانا 29ێ چلەیێ یا د ناڤبەرا حکوومەتێ و ھەسەدێ دە، ھاتیە ئەرکدارکرن.

خالێن سەرەکی یێن رێکەفتنا 29ێ چلەیێ

حکوومەتا سووریەیێ د 29ێ چلەیا بۆری دە راگھاندبوو، وان لگەل ھەسەدێ ل سەر ئاگربەستەکا گشتی و پەیمانەکا بەرفرەھ ل ھەڤ کریە. ل گۆری ئاگاھیان، خالێن ھەری گرینگ یێن ڤێ لھەڤکرنێ ئەڤن:

– ھێزێن لەشکەری: ھێزێن سووریەیا دەمۆکراتیک (ھەسەدێ) دێ ببە پارەکا وەزارەتا بەرەڤانیێ یا سووریەیێ، لێ وەکی لیوا و یەکینەیێن لەشکەری دێ ل دەڤەرێن خوە بمینن.

– دۆزا ئەولەھیێ: ھێزێن ئەولەھیێ دێ ببن پارەکا وەزارەتا ناڤخوەیی یا سووریەیێ و دێ ئەرکێ پاراستنا ناڤ باژاران وەربگرن؛ ئارتێشا سووریەیێ دێ نەچە ناڤ چ باژار و گوندێ کوردان.

– برێڤەبرن و زمان: پەروەردە ب زمانێ کوردی ل دبستان و زانینگەھان دێ بێ فەرمیکرن. کارمەندێن رێڤەبەریا خوەسەر دێ ببن کارمەندێن دەولەتێ و برێڤەبرنا دەڤەرێ دێ د دەستێ خەلکێ دەڤەرێ دە بە.

– رەوشا کۆبانێ: دۆرپێچا ل سەر کۆبانیێ دێ بێ راکرن و ئەو ھێز دێ ژ ھوندر بۆ دەردۆرا وی باژاری بێن ڤەکشاندن.