عایشەگول: پرسا کوردان ھین ژی وەکی پرسگرێکەکا ئەولەھیێ تێ دیتن

بەردەڤکا دەم پارتیێ راگھاند کو، پرسا کوردان ھین ژی وەکی پرسگرێکەکا ئەولەھیێ تێ دیتن و ناڤێ وێ پرسگرێکێ د راپۆرتا نوویا کۆمیسیۆنێ دە ژی نەھاتیە ئەشکەرەکرن.

بەردەڤکا پارتیا وەکھەڤی و دەمۆکراسیا گەلان (دەم پارتی) عایشەگول دۆگان ئیرۆ رۆژا چارشەمبێ، 25ێ سباتا 2026ێ، راگھاند کو، ھەر چەند ئەو راپۆرتا کۆمیسیۆنێ رەخنە دکن ژی، لێ ئەو ئامادەکرنا وێ راپۆرتێ وەکی خالەکا دیرۆکی دبینن کو ھەمی ئالیێن سیاسی و جڤاکی ئانینە جەم ھەڤ.

بەردەڤکا پارتیا وەکھەڤی و دەمۆکراسیا گەلان (دەم پارتی) ھەروەسا گۆت: پرسا کوردان ھین ژی وەکی پرسگرێکەکا ئەولەھیێ تێ دیتن، و ناڤێ وێ پرسگرێکێ ژی ھین نەھاتیە ئەشکەرەکرن.

عایشەگول دۆگان ھەروەسا گۆت: رایا گشتی ب تەڤاھی باوەری ب وێ پێڤاژۆیێ نینە. ئەو ب ئەشکەرەیی دپرسن، د دەمەکێ دە کو سەلاحەدین دەمیرتاش د گرتیگەھێ دە بە و پەرگالا قەیوومان بەردەوام بە، ئەو چاوا باوەر بکن؟

بەردەڤکا ناڤبری رۆن ژی کر: د وێ راپۆرتێ دە ھین ژی ناڤێ وێ پرسگرێکێ نەھاتیە ئانین. گەلۆ ئەو دێ چاوا وێ پرسگرێکێ ب خوە چارەسەر بکن؟ ھندەک پێنگاڤ ھەنە کو پێدڤیتیا وان ب گوھەرتنا قانوونێ نینە، وەکی پرسا قەیوومان و بجیھانینا بریارێن دادگەھێ.

بەردەڤکا دەم پارتیێ ئاماژە ژی دا: ھوون ل بەندا چ نە کو قەیوومان بداوی بکن؟ تشتێ دن گوھەرتنێن قانوونی نە. ئاوایێ سەرەدەریکرنا ب وان کەسان رەیێن کو چەکان دادنن دێ چاوا بە؟ ئەم دبێژین کو بلا سەرەدەریەکا وەکھەڤ و تەڤگر ھەبە، و دڤێت ھەر کەسەکێ کو چەکان دانە ئازاد بە و بکارە د ناڤ سیاسەتا دەمۆکراتیک دە بخەبتە.

ئەڤ ژی د دەمەکێ دەیە کو، راپۆرتا ھەڤپارا کۆمیسیۆنا پارلامەنتۆیا ترکیەیێ د رۆژا 18ێ سباتا ئیسال دە ب پرانیا دەنگان ھاتبوو قەبوولکرن. وێ راپۆرتێ پرسا کوردان د چارچۆڤەیا “تەرۆر و ئەولەکاریێ” دە نرخاندبوو و بەھسا ناسکرنا ماف و ناسانمەیا کوردان ژی نەکربوو. تەڤی ڤێ یەکێ ژی، دەم پارتیێ دەنگێ ئەرێ دابوو وێ راپۆرتێ.