دەمێ قەیوومێ مێردینێ دو مەھێن دن ھاتە درێژکرن
دەمێ رێڤەبرێ وەکێ قەیووم ل مەردینێ ھاتی ئەرکدارکرن د شارەداریا باژارێ مەزنا مێردینێ دە دو مەھێن دن ھاتە درێژکرن.
پشتی کو شارەدارێ باژارێ مەزن ئەحمەد تورک د 4ێ مژدارا 2024ێ دە، د چارچۆڤەیا لێپرسین و دۆزگەریا تەرۆرێ دە ژ کار ھاتە دوورخستن، والیێ مێردینێ تونجای ئاککۆیون ژ ھێلا وەزارەتێ ڤە وەکی رێڤەبەر ھاتە ئەرکدارکرن. دەمێ ئەرکدارکرنێ ھەر دو مەھان جارەکێ تێ نووکرن.
ل گۆری بریارا وەزارەتا کارێن ناڤخوەیا ترکییەیێ ژ 4ێ ئادارا 2026ێ پێ ڤە ژ نوو ڤە ھاتە نرخاندن و دو مەھێن دن ھاتە درێژکرن. د ڤێ چارچۆڤەیێ دە قەیوومێ ل شارەداریا باژارێ مەزنا مێردینێ دێ ئەرکێن خوەیێن ھەیی بدۆمینە.
ئەڤ ژی د دەمەکێ دەیە کو، دەم پارتیێ ل رۆژا پێنجشەمێ، 26ێ سباتا 2026ێ، ب تەڤلیبوونا ھەڤسەرۆکێ وێ پارتیێ تونجەر باکرھان ل بەر شارەداریا باژارێ مەزنا دییاربەکرێ چالاکیەک ب درووشما “ئەم بەرەڤانیێ ژ ئیرادەیا خوە دکن، ئەم دەنگێ خوە ل دژی سەپاندنا قەیوومان بلند دکن” ل دار خست، و ھەڤسەرۆکێن شارەداریێن پارێزگەھ و دەڤەرێن گرێدایی دەم پارتیێ ژی تەڤلی وێ چالاکیێ بووبوون.
ھەڤسەرۆکێ پارتیا وەکھەڤی و دەمۆکراسیا گەلان (دەم پارتی) تونجەر باکرھان د وێ چالاکیێ دە راگھاند کو، ژ بۆ بسەرخستنا قۆناغا نوویا پێڤاژۆیا ئاشتیێ، دڤێت سەپاندنا قەیوومان بێ بداویانین و ھەڤسەرۆکێن شارەداریان یێن کو ژ کار ھاتنە دەرخستن ژ بۆ سەر کار و ئەرکێن وان بێن ڤەگەراندن.
وەزارەتا ناڤخوەیا ترکیەیێ راگھاند، دەما قەیوومێ شارەداریا باژارێ مەزنا مێردینێ بۆ دو مەھێن دن ھاتیە درێژکرن. ل گۆری ڤێ بریارێ، پارێزگارێ مێردینێ دێ ھەتا 4ێ ئادارا 2026ێ ب ئاوایێ وەکالەت د پۆستا شارەداریێ دە بمینە.
پارێزەرێ ئەحمەد تورک دەربارێ بریارێ دە داخویانیەک دا و دەستنیشان کر، دانینا قەیوومان بنپێکرنا مافێ دەنگدانێ و ل دژی دەستوورێیە. پارێزەر بال کشاند سەر قۆناغا سیاسی یا ھەرێمێ و گۆت: “د ڤێ دەمێ دە کو بەحسا ئاشتیێ تێ کرن، ئەگەر سیستەما قەیوومان ب داوی ببە، دێ باوەریا ملەت ل ھەمبەری پێڤاژۆیا ئاشتیێ ھێن زێدەتر ببە.”
ئەحمەد تورک د ھلبژارتنێن ھەرێمی یێن 31ێ ئادارا 2024ێ دە وەکی بەربژارێ دەم پارتیێ ب پرانیا دەنگان وەکی ھەڤشارەدارێ مێردینێ ھاتبوو ھلبژارتن. لێ بەلێ وەزارەتا ناڤخوە د 4ێ مژدارا 2024ێ دە ل گەل ھەڤشارەدارێن ئێلھ و خەلفەتیێ، ئەحمەد تورک ژی ب ھنجەتا “ئەندامتیا رێخستنێ” و لێپرسینێن سیاسی ژ وەزیفەیێ دوور خستبوو.
ئەڤ بریارا درێژکرنێ د دەمەکێ دە تێ، ل ترکیە و باکورێ کوردستانێ نیقاشێن ل سەر “پێڤاژۆیا نوویا ئاشتیێ” گەرمن. پشتی بریارێن پەکەکێ یێن ژ بۆ خوەھلوەشاندن و دانینا چەکان، دھات چاڤەرێکرن کو حکوومەت گاڤێن دەمۆکراتیک باڤەژە و داوی ل سیستەما قەیوومان بینە دا کو رێ ل بەر دیالۆگەکا سڤیل وەرە ڤەکرن. لێ بەلێ، بریارا داوی یا وەزارەتێ نیشان ددە کو سییاسەتا قەیوومان وەکی خوە بەردەوامە.
