سەرۆک بارزانی: راپەرین هلگرا پەیاما ئازادیخوازی و ئیرادەیا ژیانا ب سەربلندییە
سەرۆک مەسعوود بارزانی ب بۆنەیا 35 مین سالڤەگەرا راپەرینا ئادارا 1991ێ پەیامەک بەلاڤ کر و راگهاند، راپەرین پەیاما ئازادیخوازی و ئیرادەیا ژیانا سەربلندە. سەرۆک بارزانی هەروها هێڤی خواست کو کێشەیێن ناڤچەیێ ب رێیێن ئاشتیانە وەرن چارەسەرکرن.
سەرۆک مەسعوود بارزانی ئیرۆ 5ێ ئادارێ ب بۆنەیا 35 سالیا دەستپێکرنا راپەرینا گەلێ کوردستانێ پەیامەکە پیرۆزباهیێ ئاراستەیی مالباتێن سەربلندێن شەهیدان، پێشمەرگەیێن قەهرەمان و گەلێ کوردستانێ کر. سەرۆک بارزانی د پەیاما خوە دە بال کشاند سەر قەهرەمانیا تێکۆشەر و ئازادیخوازێن کو د گهیشتنا ب ڤێ دەستکەفتا مەزن دە خوەدی رۆل بوون.
دەقا پەیاما سەرۆک بارزانی:
ب ناڤێ خوەدایێ مەزن و دلۆڤان
ب بۆنەیا سی و پێنجەمین سالڤەگەرا دەستپێکرنا راپەرینا گەلێ کوردستانێ، پیرۆزباهیێ ل مالباتێن سەربلندێن شەهیدان، پێشمەرگەیێن قەهرەمان، خەلکێ خۆشەویستێ کوردستانێ و هەموو وان نیشتمانپەروەر، تێکۆشەر و ئازادیخوازان دکم کو د گهیشتنا ب ڤی دەستکەفتێ بهایێ گەلێ مە دە رۆلەکە وان هەبوویە.
راپەرین بەرهەم و بەردەوامیا خەبات و قوربانیدانا دەهسالان یا جەماوەر و هێزێن تێکۆشەرێن کوردستانێ بوو. ئەو روودانا پێنڤیسا شانازیێ، ژ بۆ هەر تاکەکی کوردستانی یێ د نها و پاشەرۆژێ دە هلگرا پەیاما تەسلیمنەبوون، ئازادیخوازی و ئیرادەیا ژیانا ب سەربلندییە.
نها ناڤچەیا مە د رەوشەکە پر ئالۆز و هەستیار رە دەرباس دبە و ئەم هێڤی دکن کو هەر چ کێشە و ناکۆکیێن ل هەرێمێ هەنە ب رێیا ئاشتیانە بگهیژن ئەنجام و چارەسەریێ. ئەم ژی چ ژ دەستێ مە وەرە ئەمێ بکن، دا کو کوردستان ژ شەر، نەهامەتی و ناخوەشیان دوور بە و پاراستی بمینە.
د ڤێ بیرانینا پیرۆز دە، ئەم سلاڤان ئاراستەیی شەهیدێن راپەرینێ و هەموو شەهیدێن رێیا ئازادیا کورد و کوردستانێ دکن.
