جوانەکی کورد ل قامشلۆیێ د بن ئیشکەنجەیا چەکدارێن پەیەدێ دە جانێ خوە ژ دەست دا
مالباتا جوانێ ب ناڤێ عەلا عەدنان ئەمین، کو وەلاتیەکی سوێدی یێ ب ئەسلێ خوە کوردێ رۆژئاڤایە و 33 سالییە، راگھاند کو کورێ وان پشتی چەند مەھان ژ گرتنا وی ل باژارێ قامشلۆیێ ل رۆژئاڤا کوردستانێ ژیانا خوە ژ دەست دایە. مالباتێ چەکدارێن پارتیا یەکیتیا دەمۆکرات (پەیەدێ) تاوانبار کرن کو بوونە سەدەما مرنا وی د بن ئێشکەنجەیێ دە.
ل گۆری ئاگاھیێن کو خوشکا وی دانە، ھێزەکا ئەولەھیێ یا ژ چەند ئەندامان پێک دھات، د 18ێ ئیلۆنا بۆری دە دەمژمێر یەکێ شەڤێ ب سەر مالا وان دە گرتیە. چەکدارێن رووپێچکری ژ ئەیوان و پەنجەرەیان رە دەرباسی مالێ بوونە و عەلا کەلەپچە کرنە، بێیی کو سەدەما گرتنا وی ژ مالباتێ رە ئەشکەرە بکن.
ھەر وھا وێ ئانی زمان کو مالباتێ پشتی بوویەرێ ھەول دایە ل گەلەک ناڤەندێن ئەولەھیێ ئاگاھیان ل سەر چارەنووسا وی وەربگرە، لێ د دەستپێکێ دە ئالیێن تێکلدار ھەبوونا وی ل جەم خوە رەد کرن. پشتی نیشاندانا دیمەنەکی ڤیدیۆیی کو ترومبێلێن بەشداری گرتنا وی بوونە بەلگە دکە، پشترە ژ مالباتێ رە ھات راگھاندن کو ئەو ژ بۆ لێپرسینێ ھاتیە گرتن، لێ چ ئاگاھیێن زێدە ل سەر رەوشا وی نەدان.
ل گۆری خوشکا وی، مالباتێ ھەول دایە پارێزەران ژ بۆ شۆپاندنا دۆزێ بگرە، لێ ھەموو ھەولدان بێەنجام مانە؛ پارێزەران رەد کرنە کو دۆزێ وەربگرن ژ بەر کو دۆز گرێدایی دەزگەھێن ئیستیخباراتێیە. ھەر وھا دیار کر کو ھندەک کەسێن کو خوەستنە ل سەر دۆزێ بپرسن، ب گرتنێ ھاتنە تەھدیتکرن.
د 8ێ ئادارا ئیسال دە، بابێ عەلا ژ ھەژمارەکا ناڤنەتەوەیی تەلەفۆنی وی ھات کرن و ژێ ھات خوەستن کو بچە باژارێ حەسەکێ ژ بۆ وەرگرتنا کورێ خوە، پشترە ژێ ھات خوەستن کو بچە نەخوەشخانەیا نشتمانی یا ل ور. دەما دایک و باب گھیشتن نەخوەشخانەیێ، جەنازەیێ وی د ئۆدەیەکێ دە دیتن.
مالباتێ دیار کر کو راپۆرتا پزیشکی یا کو ژ وان رە ھاتی دایین نیشان ددە کو مرن د 16ێ چلەیا بۆری دە ژ بەر کریزا دل چێبوویە، لێ ئەندامێن مالباتێ تەکەز کرن کو شۆپێن لێدان و ئێشکەنجەیێ ب ئاوایەکی ئەشکەرە ل سەر لاشێ وی ھەبوون. ڤێ یەکێ ھشت کو ئەو جەنازە ڤەگوھێزن نەخوەشخانەیەکا تایبەت ل قامشلۆ دا کو راپۆرا پزشکی سەدەما راستییا مرنێ و دیرۆکا وێ ب ھوورگولی دیار بکە.
عەلا بەریا نێزی 15 سالان ژ سووریێ بەر ب سوێدێ ڤە چووبوو، سالا پار ڤەگەریا قامشلۆ و د سباتا 2025 دە زەوجیبوو. مالباتێ داخواز ژ رایەدارێن سوێدێ کر کو دەربارێ شەرت و مەرجێن مرنا وی دە لێپرسینەکا فەرمی بدن دەستپێکرن و بەرپرسان سزا بدن.
ل ئالیێ دن، ھەتا نھا ژ ئالیێ ھێزێن ئاساییشێ یان ژی وەزارەتا دەرڤەیا سوێدێ ڤە چ داخویانیەک فەرمی ل سەر ڤێ بوویەرێ نەھاتیە دایین.
